Imami francez burgoset se ndihmoi emigrantët të shkonin në Angli

Një gjykatë në Francë ka dënuar një imam me dy vjet burgim për shkak se ndihmoi emigrantët të kalonin ilegalisht kanalin anglez dhe të shkonin në Britaninë e Madhe.

Imami, 39 vjeçar i cili është edhe refugjat politik nga Irani, u dënua nga gjykata e krimeve të lehta këtë të hëne. Një tjetër 29 vjeçar, nga Senegali gjithashtu u dënua se i asistoi imamit dhe e ndihmoi atë. Ky i fundit u dënua me 18 muaj burg.

Lajmi u bë i ditur, pasi që të dielën 70 persona tentuan që ta kalonin kanalin anglez, i cili e lidh Britaninë me Francën. Sekretari i brendshëm i Britanisë, Sajid Javid ka thënë se ky fenomen është shumë shqetësues, raporton Euronews, transmeton Gazeta Express.

Javid tha se “nën rregullat e Bashkimit Evropian, një emigrant duhet të kërkojë azil, në vendin e parë në të cilin i shkel këmba, e jo të tentojë të shkojë në vende të tjera. Që nga Janari, 30 persona kanë arritur ilegalisht përmes anija, nga Evropa për në Britani”.

Imami, i cili u dënua, nuk u identifikua nga mediat franceze për shkak të sigurisë së tij.

Veprimi i tij u zbulua përmes përgjimeve telefonike. Sipas këtyre përgjimeve, personat që ai i ndihmoi të shkonin në Britani, e kishin vizituar atë disa herë në xhaminë e tij përpara se ta kryejnë veprimin.

Imami dhe 29 vjeçari nga Senegali, e rrëfyen të gjithë atë që e kanë bërë, por pretenduan se nuk e kanë ditur se veprimi është kundër rregullave të BE-së.