Albright letër Thaçit: Punuam bashkë për të ardhmen e Kosovës

Pas vizitës në Kosovë, ish-sekretarja amerikane, Madeleine Albright, i është drejtuar me një letër udhëheqësve në Kosovë.

Në letrën e dërguar presidentin Thaçi, Albright shprehet mirënjohëse për festën e organizuar për përvjetorin e 20-të dhe thotë se kemi punuar bashkë për një kohë të gjatë që t’i sigurojmë një të ardhme të sigurt Kosovës.

“I dashur President Thaçi, Ishte vërtetë kënaqësi festimi i demokracisë së Kosovës me ju. Ju jam mirënjohëse që keni organizuar një festë të veçantë, të paharrueshme dhe të jashtëzakonshme për këtë përvjetor. Jam shumë e nderuar që pranova Medaljen Presidenciale të Lirisë. Kemi punuar bashkë për një kohë të gjatë që t’i sigurojmë një të ardhme të sigurtë Kosovës. Kënaqem tek shoh se sa shumë ka ecur ky vend.

E vlerësoj diskutimin e mirë që kishim rreth asaj se çfarë duhet të ndodhë tutje për të përparuar dhe për ta ndritur demokracinë. Jam shumë krenare për lidhjen e fortë në mes të NDI dhe Kosovës. Duam që të vazhdojmë punën me ju edhe në fazën tjetër. Pres që të ju takoj sërish së shpejti. Gjithë të mirat, Madeline”, shkruan Albright në letrën drejtuar Presidentit Thaçi.