Kurti takon O’Conell: Kosovës i duhet qeveri e re që lufton korrupsionin

Kryetari i Lëvizjes Vetëvendosje, Albin Kurti dhe zyrtarë të tjerë të kësaj partie, kanë pritur në takim lamtumirës ambasadorin e Mbretërisë së Bashkuar në Kosovë, Ruairi O’Connell dhe sekretarin politik, Samuel Paice.

Zyrtarët e Lëvizjes e falënderuan ambasadorin O’Connell për bashkëpunimin gjatë misionit të tij në Kosovë dhe për qasjen e sinqertë që kishte në relacion me institucionet e vendit tonë.

Gjatë këtyre viteve, ambasadori O’Connell gjithashtu dha një kontribut drejt avancimit të marrëdhënieve ndërshtetërore mes Kosovës dhe Mbretërisë së Bashkuar.

Në takim,  Kurti e theksoi rëndësinë e zgjedhjeve të parakohshme që pritet të shpallen së shpejti, dhe, domosdoshmërinë e ardhjes së një qeverie të re, e cila në theks ka luftimin e krimit dhe korrupsionit, zhvillimin ekonomik për punësim, rritjen e mirëqenies së qytetarëve, e sidomos përmirësimin e cilësisë së arsimit e shëndetësisë.

“Populli ynë përherë është falënderues ndaj mbështetjes së pa rezervë të Mbretërisë së Bashkuar, si një prej aleatëve kryesor dhe një prej shteteve më të fuqishme në Evropë. Shteti ynë duhet të punojë në thellimin e marrëdhënieve bilaterale me shtetin e z. O’Connell. E, kjo arrihet me një qeveri e cila nuk ka të akuzuar për korrupsion dhe krim të organizuar”, thuhet në njoftimin e bërë për media nga Vetëvendosje.

Në fund të njoftimin thuhet se, Vetëvendosje i dëshiron dhe uron ambasadorit O’Connell suksese në angazhimet e tij të radhës.