Fjalë Kyçe

Kusari-Lila kërkon në Kongresin amerikan njohje të reja për Kosovën

Kusari-Lila kërkon në Kongresin amerikan njohje të reja për Kosovën

Deputetja e Kuvendit të Kosovës, Mimoza Kusari – Lila, e cila po merr pjesë në Forumin e liderëve parlamentarë në Kongresin Amerikan në Uashington, ka folur për të arriturat dhe sfidat e shtetit të Kosovës, ndërsa u bëri thirrje deputetëve të shteteve pjesëmarrëse që nuk e kanë njohur Kosovën, ta njohin shtetin e ri demokratik të Evropës.

“Kosova është demokraci parlamentare për 18 vite dhe shtet i pavarur për 11 vite. Gjatë kësaj periudhe kemi pasur gjashtë palë zgjedhje parlamentare dhe sfidat tona lidhur me procesin, por gradualisht kemi përparuar në organizimin e procesit zgjedhor. Sfida e Parlamentit të Kosovës janë mbajtja e fokusit në proceset zhvillimore dhe stabiliteti politik e avancimi demokratik. E kemi kuptuar se nuk mund të kemi zhvillim të qëndrueshëm pa demokraci të qëndrueshme”, tha Kusari-Lila, thuhet në njoftimin për media të zyrës për informim të Kuvendit të Kosovës.

Deputetja Kusari – Lila në emër të delegacionit të Kosovës, falënderoi kongresistët David Price (D) dhe Vern Buchanan (R), bashkëkryesuesit e programit për partneritet demokratik të Kongresit, si dhe përfaqësuesit e USAID, NDI dhe IRI, për ndihmën për zhvillimin e demokracisë në Kosovë.