Mustafa: Jemi partia më e madhe sipas sondazheve

Lidhja Demokratike e Kosovës sot po e mbanë mbledhjen e Këshillit të Përgjithshëm, ku do të zgjedhë kryesinë e re.

Lideri i saj, Isa Mustafa, në këtë mbledhje ka thënë se në bazë të sondazheve, LDK është partia më e madhe ndërsa ka theksuar se partia e tij qeveris në shumicës e komunave të Kosovës

“Dëshiroj që sot ta them para jush që LDK është subjekti me numrin më të madh të komunave që qeverisin, po ashtu matjet e opinionit publik LDK’në e radhisin si të parën për besimin me mbështetje të lartë. Do të bëj një kronologji të zgjedhjeve të fundit nacionale dhe lokale. Në këto zgjedhje kemi hyrë pas mocionit dhënë atë herë. Me këtë koalicion në zgjedhjet e fundit si LDK kemi marrë 29 ulëse në Kuvend dhe pas konstituimit të Grupeve Parlamentare, LDK ka mbetur me 25 vende në Kuvend krahasuar me grupet e tjera parlamentare”, ka thënë Mustafa.

Ndërkaq zëdhënësi i LDK’së, Besian Mustafa, para takimit ka thënë se në këtë mbledhje nuk do të diskutojnë për tema që kanë të bëjnë me mandatarin për kryeministër dhe për koalicionet parazgjedhore.

Përveç kryesisë do të diskutohet edhe për zgjedhjet e fundit lokale e nacionale, ndërkohë ende nuk dihet nëse do të diskutohet për mandatarin për kryeministër dhe për koalicionin me Vetëvendosjen.

Sekretari i Përgjithshëm i LDK’së, Ismet Beqiri në një përgjigje dhënë Gazetës Express ka thënë se nuk mund të thotë saktë nëse do të diskutohet për këto çështje, por ka sqaruar se nuk do të merret ndonjë vendim.