Ankesat për subvencionimin e bizneseve, Ministria e Financave del me njoftim

Ministria e Financave ka njoftuar se ka pranuar mbi 4 mijë ankesa nga tatimpaguesit lidhur me subvencionimin e pagave për bizneset aktive dhe të vetëpunësuarve nga Programi i Rimëkëmbjes Ekonomike.

Sipas njoftimit, Qeveria ka nxjerrë vendimin ku janë ndarë mjetet buxhetore prej 6 milionë e 500 mijë eurosh për subvencionimin e pagave.

“Rrjedhimisht, Komisioni i Ankesave vlerëson se një pjesë e konsiderueshme e ankesave të tatimpaguesve që nuk kanë përfituar nga vendimi nr. 10/33, i ndryshuar dhe plotësuar, por edhe të atyre që nuk kanë parashtruar ende ankesë do të subvencionohen nga vendimi nr. 03/59, me kusht që i plotësojnë kriteret e përcaktuara. Andaj, Komisioni i Ankesave do të pres ekzekutimin e mjeteve buxhetore prej 6.5 milionë euro, sipas vendimit nr. 03/59. Për ekzekutimin e plotë të mjeteve buxhetore në kuadër të këtij vendimi do të njoftoheni me një njoftim të veçantë përmes uebfaqes zyrtare të Ministrisë së Financave”, thuhet ndër të tjera në njoftimin e MF-së.

Po ashtu, bëhet e ditur se të gjitha bizneset që vlerësojnë se i plotësojnë kriteret dhe nuk janë përfitues të këtij subvencionimi, mund të dërgojnë ankesë brenda 30 ditëve nga data e njoftimit për ekzekutimin e plotë të mjeteve buxhetore.

Njoftimi i plotë:

Njoftim për tatimpagues

Të nderuar tatimpagues,

Komisioni i Ankesave i themeluar me vendimin e Ministrisë së Financave për shqyrtimin e ankesave të tatimpaguesve lidhur me ndarjen e mjeteve buxhetore për subvencionimin e linjës së pagave për bizneset aktive dhe të vetëpunësuarve nga Programi i Rimëkëmbjes Ekonomike, njofton tatimpaguesit se ka pranuar mbi 4,000 (katër mijë) ankesa të adresuara në postën elektronike [email protected], lidhur me ekzekutimin e mjeteve buxhetore prej gjashtëdhjetë milionë euro (60,000,0000.00 €), sipas vendimit nr. 10/33 të datës 28 shtator 2020.

Duke marrë parasysh se në kuadër të vendimit nr. 10/33 një numër biznesesh kanë mbetur pa përfituar nga kjo masë, Qeveria e Republikës së Kosovës ka nxjerrë vendimin nr. 03/59, ku janë ndarë mjetet buxhetore prej gjashtë milionë e pesë qind mijë euro (6,500,000.00 €) për subvencionimin e linjës së pagave për bizneset aktive dhe të vetëpunësuarve, si vazhdimësi e vendimit nr. 10/33 të datës 28 shtator 2020, ndryshuar dhe plotësuar.

Rrjedhimisht, Komisioni i Ankesave vlerëson se një pjesë e konsiderueshme e ankesave të tatimpaguesve që nuk kanë përfituar nga vendimi nr. 10/33, i ndryshuar dhe plotësuar, por edhe të atyre që nuk kanë parashtruar ende ankesë do të subvencionohen nga vendimi nr. 03/59, me kusht që i plotësojnë kriteret e përcaktuara.

Andaj, Komisioni i Ankesave do të pres ekzekutimin e mjeteve buxhetore prej 6.5 milionë euro, sipas vendimit nr. 03/59. Për ekzekutimin e plotë të mjeteve buxhetore në kuadër të këtij vendimi do të njoftoheni me një njoftim të veçantë përmes uebfaqes zyrtare të Ministrisë së Financave.

Pas ekzekutimit të plotë të mjeteve buxhetore sipas vendimit nr. 03/59, nëse vlerësoni se i plotësoni kriteret dhe nuk jeni përfitues i subvencionit, mund ta dërgoni ankesën tuaj në adresën: [email protected], brenda tridhjetë (30) ditëve nga data e nxjerrjes së njoftimit të veçantë lidhur me ekzekutimin e plotë të mjeteve buxhetore. Ankesa duhet domosdoshmërisht të përmbajë numrin unik identifikues të tatimpaguesit apo në rast se tatimpaguesi nuk posedon numrin unik identifikues, duhet të përmbajë numrin fiskal.

Me respekt,

Klit Shala, Kryesues i Komisionit të Ankesave.