Festë më ndryshe në Shtëpinë për Persona të Moshuar

Jetë të re kanë krijuar të moshuarit në institucionin, të cilin ata e konsiderojnë shtëpi, e pjesëtarët e saj anëtarë të familjes.

Nga pothuajse të gjitha komunat e Kosovës, kujdesin e kanë gjetur në këtë institucion.

Kohën në Shtëpinë për Persona të Moshuar pa Përkujdesje Familjare ata e kalojnë në mënyra të ndryshme, dikush duke luajtur domino e dikush me punë dore, raporton KTV.

Pjesë e kësaj shtëpie, që nga ’89-ta, është Ismet Osmani nga Prishtina.

Jeta për të nuk ka qenë e lehtë, andaj edhe thotë se vlerëson çdo kujdes që i ofrohet.

E, qe 12 vjet, në këtë shtëpi jeton edhe Alije Ashiku, kurse rreth 5 muaj më parë, asaj i është bashkuar edhe Suzana Gergolli.

Më shumë respekt e dashuri për të moshuarit, kërkon 83-vjeçari nga Ferizaj, Smajl Ibishi.

Ndonëse në moshë të shtyrë, punimet e dorës i kanë shumë në qejf.

Përkundër punimeve të veshjeve të ndryshme, atyre u pëlqen shumë edhe vizatimi.

Me këto punime, thonë se heqin mërzinë e bëjnë që koha të kalojë më shpejt.

Derisa thur xhemperë, 77-vjeçarja Shenaze Salihu, nuk heziton të shpalosë copëza historie nga fëmijëria e saj.

Megjithatë, jo të gjithëve u pëlqejnë punimet e dorës.

Ndonëse 78-vjeçare, Hata Uka, ka zgjedhur që kohën e lirë ta kalojë duke mësuar diçka të re.

Në anën tjetër, drejtoresha e shtëpisë për persona pa përkujdesje familjare, Raze Aliqkaj, thotë se puna me të moshuar është sfiduese.

Pjesë e shtëpisë së të moshuarve janë 82 persona, prej të cilëve, 49 gra dhe 33 burra. Vetëm gjatë vitit 2019, në këtë institucion janë vendosur 25 persona.