Votohet në lexim të parë Buxheti për vitin 2020

Me 63 vota për ka kaluar në lexim të parë ligji për buxhetin. “Shqyrtimi i parë i projektligjit mbi ndarjet buxhetore për buxhetin e Republikës së Kosovës për vitin 2020”, u votua me 63 deputetë për.

Kryeministri i Kosovës, Albin Kurti, paraprakisht u ka bërë thirrje deputetëve të Kosovës që ta votojnë buxhetin.

Ai tha se në situatën aktuale, ka gjasë që mos të mbahet më asnjë seancë javëve në vijim.

“Kjo situatë është e pazakonshme, nuk e kemi hasur që prej çlirimit. Urojmë që të arrijmë të ulim shpejtësinë e shtrirjes së COVID-19. Edhe ne nuk do të donim që gjithçka të bëhet brenda një dite, por nuk ka garancion që mund të mbajmë seanca në javët apo ditët në vijim sepse nuk e dimë se çka do të ndodhë me virusin. As ne nuk jemi në rregull këtu me rregullat e përcaktuara. Nuk mund të kemi buxhet emergjent pa pasur buxhet të ri. Ju ftoj që ta kalojmë sot buxhetin, ta votojmë propozimin e Rexhep Selimit. Ky buxhet nuk është i ri ashtu siç është qeveria e re. Janë mbi 300 milionë euro obligime”, tha Kurti.

Para fillimit të seancës, deputetët janë testuar në hyrje të Kuvendit.

Secilit deputet i është bërë kontrolli i temperaturës para se të hyjë në sallën e seancave.

Në hyrje të Kuvendit secili u obligua që të dezinfektojë duart.

Pak prej tyre kanë vendosur maska apo doreza të cilat janë paraparë si masa mbrojtëse nga koronavirusi.