Instituti Hidrometeorologjik njofton se çfarë moti do të mbretërojë pesë ditët në vijim

Instituti Hidrometeorologjik i Kosovës përmes një komunikate për media bën të ditur se në pesë ditët e ardhshme në Kosovë do të mbretërojë mot i vranët e me intervale me diell.

“Vendi ynë do të vazhdojë të mbetet nën ndikimin e kushteve pothuaj të ngjashme meteorologjike, me ditët e fundit. Mot i vranët dhe me intervale me diell”, thuhet në komunikatë.

Vranësirat gjatë ditë së mërkurë parashihen të sjellin shi të intensitetit mesatar deri të lartë.

“Në fushat barike pritet të ketë rënie të lehta, temperaturat minimale parashihen të lëvizin ndërmjet 3-7 gradë Celsius, ndërsa maksimalet e ditës parashihen të lëvizin ndërmjet 12-22 gradë Celsius. Indeksi UV do të jetë në vlera të rritura, ndërsa kushtet biometeorologjike dhe agrometeorologjike do të jenë të favorshme për shkak të numrit të mjaftueshëm të orëve me diell dhe reshjeve të fundit”, thuhet në komunikatë.

Do të fryjë erë kryesisht nga juglindja herë-herë me vrull, shpejtësia maksimale në veri të Dukagjinit mund të arrijë deri 20 m/s, ndërsa pjesa më e madhe e rrafshit të Kosovës, shpejtësinë e erës mund ta arrijë deri 12 m/s.