Kurti takon të mbijetuarën e vetme të familjes Elshani nga Korrotica e Ulët e Drenasit

Kryetari i Lëvizjes Vetëvendosje, Albin Kurti, ka takuar Teuta Elshanin – të mbijetuarën e vetme të familjes Elshani nga Korrotica e Ulët e Drenasit.

Kujtojmë se më 17 prill 1999, forcat serbe në masakrën e Poklekut të Vjetër kanë vrarë shkrimtarin Ymer Elshani, bashkëshorten e tij Nafijen, katër djemtë Ardianin (25 vjeç), Miranin (20), Kujtimin (15) e Nderimin (10), si dhe kunatën e tij Shukrijen. Të nesërmen ia vrasin edhe nënën Nailen, motrën e heroit Fazli Greiçevci, njofton Klan Kosova.

“Teuta Elshani ka shpëtuar atë ditë sepse ishte studente e kimisë në Prishtinë. E mbijetuara e vetme e familjes nga Korrotica e Ulët e Drenasit, që prej 20 vjetësh, jeton në Atlanta të ShBA-ve. Ajo ka katër fëmijë: Ejonën, Erën, Miranën dhe Ardianin. Për çdo vit vjen në Kosovë nga dashuria për vendlindjen e me ngushëllimin e vetëm që gjyshja Naile në çastet e fundit të jetës së saj nuk kishte qenë në dijeni se një ditë më parë ia kanë vrarë djalin e katër nipat”.

“Nga shtëpia botuese ‘Meshari’ dhe nën përkujdesjen e Teutës është botuar kompleti i veprave prej 11 vëllimesh (poezi e romane për fëmijë dhe tregime) i babait të saj, shkrimtarit tonë, Ymer Elshanit”.