Lajçaku sot takohet me Thaçin dhe liderët e partive politike

Emisari special i Bashkimit Evropian në dialogun Kosovë-Serbisë, Miroslav Lajçak, do të vazhdojë takimet në Kosovë edhe sot. Ai dje u takua me kryeministrin Avdullah Hoti dhe kryeparlamentaren Vjosa Osmani.

Sot do të takohet me Presidentin e Kosovës, Hashim Thaçi, takim që është paralajmëruar të nisë në ora 09:35.

Më pas Lajçak do të takohet edhe me liderët e partive politike në vend, raporton KosovaPress.

Kjo vizitë vjen në kohën kur tema e Asociacionit të Komunave Serbe ka bllokuar dialogun në mes Kosovës dhe Serbisë, ku kjo e fundit insiston që të diskutohet kjo temë ndërkohë Kosova vazhdon të refuzojë hapjen e saj.

E Hoti pas takimit që pati me Lajçak të martën, tha se nuk do të ketë Asociacion të Komunave me shumicë Serbe me kompetenca ekzekutive. Hoti përsëriti qëndrimin e tij që tema e asociacionit është mbyllur duke shtuar se Kosova nuk është palë që e bllokon procesin e dialogut.

Pas takimit me diplomatin sllovak, Hoti tha se ka mbështetjen e partnerëve që asociacioni nuk do të ketë kompetenca ekzekutive.