Ideja e Lukakut: Fton kompanitë e mediave sociale në takime me futbollistët, për të ulur diskriminimin racor

Sulmuesi i Chelseat, Romelu Lukaku thotë se kompanitë e mediave sociale duhet të ulen me futbollistë të Premier Ligës për të ndihmuar në luftimin e abuzimit në internet.

Një numër i madh i futbollistëve i janë nënshtruar abuzimit racist vitet e fundit dhe kanë folur për diskriminimin, duke përfshirë Lukaku dhe shokët e tij të skuadrës në Chelsea Reece James, Antonio Rudiger dhe N’Golo Kante.

Mbrojtësi anglez James fshiu përkohësisht llogarinë e tij në Instagram në fillim të këtij viti për shkak të shkallës së abuzimit në internet, ndërsa lojtarët e Premier Ligës vazhdojnë të gjunjëzohen para fillimeve për të treguar mbështetje për lëvizjen për barazinë racore.

Në një intervistë ekskluzive me CNN, Lukaku sugjeroi që kompanitë e mediave sociale mund të punojnë së bashku me lojtarët për të ndërmarrë veprime.

“Kapitenët e çdo ekipi, dhe katër ose pesë lojtarë, si personalitetet e mëdha të çdo ekipi, duhet të kenë një takim me CEO-të e Instagram dhe qeveritë dhe FA dhe PFA,” tha ai. “Ne thjesht duhet të ulemi rreth tryezës dhe të kemi një takim të madh në lidhje me të.

“Unë mendoj se të gjithë ne së bashku të kemi një takim të madh, të kemi një konferencë dhe të flasim vetëm për gjëra që duhet adresuar për të mbrojtur lojtarët, por edhe për të mbrojtur tifozët dhe lojtarët më të rinj që duan të bëhen futbollistë profesionistë”, u shpreh ylli belg.

Këtë javë, shoku i skuadrës së Lukaku te Chelsea, Marcos Alonso tha se ai nuk do të përkulet më në gjunjë para ndeshjeve pasi mbrojtësi beson se gjesti anti-racizëm po “humbet forcën”.