Rreth 40 të arratisur brenda 5 viteve, 3 vetëm sivjet

Për të burgosurit në vend as grilat nuk po kryejnë punë. Pavarësisht telave e rojeve të shumta, të dënuarit për vrasje të rënda, vjedhje e grabitje po ia dalin që të arratisen. Vetëm këtë vit, nga burgjet kanë ikur tre të burgosur, numër ky që për pesë vitet e fundit shkon në 40’të, 10 prej të cilëve vazhdojnë të jenë në kërkim nga organet e drejtësisë. Aktualisht nëpër burgjet e vendit gjenden rreth 1 mijë e 600 të burgosur.

Jeta brenda katër mureve iu është bërë fort e padurueshme. “Mundësinë” e parë që iu jepet, të burgosurit po e shfrytëzojnë që të arratisen nga burgjet.

Për t’i penguar ata nuk po bëjnë punë as rrethojat e burgjeve e as rojet e shumta që gjenden rreth e rreth këtyre objekteve. Disa prej tyre as sot e kësaj dite nuk janë kthyer për ta vuajtur dënimin.

Në Shërbimin Korrektues të Kosovës deklarojnë se arratisjet më së shpeshti bëhen nga Burgu i Dubravës dhe ai i Smrekonicës.

Zëdhënësi i SHKK’së, Florent Gashi i ka thënë Gazetës Express se vetëm gjatë këtij viti janë arratisur tre të burgosur.

Gashi tregon se numri i të arratisurve në pesë vitet e fundit shkon në rreth 40’të, të cilët kanë qenë në vuajte të dënimit në Burgun e Dubravës dhe të Smrekonicës.

“Gjatë këtij vit kanë ndodhur tri arratisje. Nga tre të arratisurit gjatë këtij viti, asnjeri nuk është kthyer në burg. Në pesë vitet e fundit 39 të burgosur janë arratisur”, ka thënë Gashi.

Në mesin e të arratisurve ka të dënuar edhe për vrasje të rënda, vjedhje e grabitje. Gashi thotë se të dënuarit që janë arratisur ishin të dënuar deri më 14 vite burgim.

“Të burgosurit e arratisur janë të gjinisë mashkullore dhe kanë qenë të dënuar për veprat penale, si: vrasje e rëndë, vjedhje e rëndë dhe lëndim trupor,  blerje, posedim, shitje dhe shpërndarje e paautorizuar e narkotikeve, grabitje, posedim ilegal i armës, kidnapim dhe plaçkitje, vrasje në tentative, etj”, thuhet në përgjigjet e Gashit drejtuar Gazetës Express.

Ndërkohë, 10 të arratisur vazhdojnë të jenë në kërkim nga organet e drejtësisë. Pavarësisht se ka vite që janë arratisur, ata ende ende nuk janë kapur.

“Personat në fjalë kanë qenë të dënuar, nga një vit deri në katërmbëdhjetë vite burgim. Gjithsejtë janë dhjetë të dënuar, të cilët janë në arrati”, tregon Gashi.

Ndërkohë, për dallim prej të burgosurve që po arratisen pa e përfunduar dënimin, të tjerë po e presin vdekjen brenda burgjeve.

Shumica e qelive në institucione korrektuese janë të mbushura me të burgosur që vuajnë nga kanceri, sëmundjet e zemrës dhe ato infektive.

Shkaku i këtyre sëmundjeve, katër të burgosur kanë vdekur gjatë këtij viti, derisa të tjerë i kanë ditët të numëruara.

Në Shërbimin Korrektues kanë deklaruar se të burgosurit që kanë ndërruar jetë ishin në vuajtje të dënimit për vepra penale si dhunim, vrasje e rëndë dhe keqpërdorim seksual me të mitur.

“Personat në fjalë vinin nga komuna të ndryshme të vendit, ndërsa  mosha e tyre  sillej prej 26 deri në 69 vjeç. Po vuanin dënimin për vepra të ndryshme penale, si: dhunim, vjedhje e rëndë, keqpërdorim seksual i personave nënë moshën gjashtëmbëdhjetë vjeçare, vrasje e rëndë etj.”, kishin thënë nga SHKK’ja.

Në KMDLNJ kanë bërë thirrje që të burgosurit që janë në gjendje të rëndë shëndetësore të dërgohen në shtëpi që të mos vdesin burgjeve.

Ndryshe, vetëm një i burgosur i kushton shtetit rreth 28 euro në ditë. Kjo shifër në fund të muajit arrin në 850 euro, ndërsa në vit shkon deri në 10 mijë euro.