Zyrtare: Në moshën 55-vjeçare, Kazuyoshi Miura bëhet me klub të ri – kalon në Portugali

Historia e “Mbretit Kazu” mori një tjetër kthesë pasi Kazuyoshi Miura iu bashkua klubit portugez të kategorisë së dytë Oliveirense në huazim nga klubi i J-League Yokohama FC, vetëm një muaj para ditëlindjes së tij të 56-të.

Ish-reprezentuesi japonez do të hyjë në sezonin e tij të 38-të si futbollist profesionist, pasi ka luajtur tashmë në Brazil, Japoni, Itali, Kroaci dhe Australi.

“Unë do të bëj një përpjekje që njerëzit të mund të më shohin duke luajtur futbollin tim, madje edhe në mjedise të reja”, deklaroi Miura.

Është një tjetër kapitull në një karrierë të jashtëzakonshme që filloi në vitin 1986, një vit para se të lindte i madhi i futbollit Lionel Messi.

Miura e filloi karrierën e tij në klubin brazilian Santos sepse Japonia nuk kishte ligë profesionale në atë kohë. Ai kaloi katër vjet në Brazil, duke luajtur për gjashtë klube duke përfshirë Santos dhe Palmeiras.

Sidoqoftë, “King Kazu” do të kthehej në vendin e tij për t’u bërë fytyra e J-League kur u lançua në vitin 1993, duke e çuar Verdy Kaëasaki drejt titujve të njëpasnjëshëm në 1993 dhe 1994.

Ai kaloi një periudhë huazimi me skuadrën e Serie A Genoa në 1994, duke u bërë lojtari i parë japonez që luan në divizionin e parë italian.

Ai shënoi 55 gola në 89 paraqitje për kombëtaren japoneze, duke e bërë atë golashënuesin e dytë më të mirë të të gjitha kohërave për Samurai Blue. Ai u tërhoq në vitin 2000 nga kombëtarja, por ka vazhduar të luajë profesionalisht edhe për dy dekada të tjera dhe duket se nuk do të ngadalësohet së shpejti.

Pasi nënshkroi për Yokohama FC në 2005, ai ka qëndruar me klubin – ose ka qenë i huazuar prej tij – që atëherë, duke e bërë këtë sezonin e tij të 19-të me ekipin.

Miura e kaloi vitin 2022 në Suzuka Point Getters – një klub i menaxhuar nga vëllai i tij – në nivelin e katërt të futbollit japonez. Në kohën e tij atje, ai shënoi dy gola në 18 ndeshje.

Në vitin 2017, ai u bë lojtari më i vjetër që shënoi në një ndeshje profesionale kur shënoi kundër Thespakusatsu Gunma në divizionin e dytë të Japonisë me 50 vjet e 14 ditë. Ai gjithashtu ndihmoi Yokohama të siguronte promovimin në divizionin më të lartë të Japonisë në fund të sezonit 2019.