Tifozët e Realit shpërthejnë kundër Barçës dhe Federatës: Ky nuk është futboll, janë Tebas dhe Negreira

Tifozët e Realit shpërthejnë kundër Barçës dhe Federatës: Ky nuk është futboll, janë Tebas dhe Negreira

Atmosfera para El Clásicos është ndezur edhe më shumë. Një javë para përballjes me Barcelonën, tifozët e Real Madridit shfrytëzuan ndeshjen ndaj Sevillas për të protestuar kundër presidentit të La Ligës, Javier Tebas, dhe klubit katalunas.

Në stadiumin “Santiago Bernabeu”, gjatë fitores 4-1 ndaj Sevillas, tifozët e organizuar të Real Madridit shpalosën një pankartë me mesazhin: “Ky nuk është futboll, janë Tebas dhe Negreira”.

Pankarta u shoqërua me thirrje kundër presidentit të La Ligës dhe akuza për mungesë transparence në futbollin spanjoll, shkruan “Mundo Deportivo”, përcjell “Gazeta Express”.

Emrat e Tebasit dhe Negreiras ishin shkruar me ngjyrat blu dhe të kuqe, në një referencë të drejtpërdrejtë ndaj Barcelonës.

Përplasja mes Real Madridit dhe Tebasit

Protesta vjen pas përshkallëzimit të konfliktit mes Real Madridit dhe Javier Tebasit. Presidenti i La Ligës kishte kritikuar televizionin zyrtar të klubit madrilen, Real Madrid TV, duke e akuzuar se përzgjedh episodet e arbitrimit për të mbështetur narrativën e vet dhe se sulmon vazhdimisht institucionet e futbollit.

Deklaratat e tij shkaktuan reagimin e ashpër të Real Madridit, i cili kërkoi zyrtarisht dorëheqjen e Tebasit nga posti i presidentit të La Ligës.

Tensionet u shtuan edhe më shumë pas mbështetjes publike që presidenti i Barcelonës, Joan Laporta, i dha Tebasit. Kjo situatë ka nxitur reagime të forta në kampin madrilen, sidomos në prag të El Clásicos.

Rasti Negreira rikthehet në qendër të polemikave

Përmendja e emrit të José María Enríquez Negreiras nuk është e rastësishme. Ish-zëvendëspresidenti i Komitetit Teknik të Arbitrave në Spanjë është në qendër të çështjes që lidhet me pagesat e bëra nga Barcelona për kompanitë e tij.

Barcelona ka deklaruar se pagesat kishin të bënin me raporte dhe këshillime teknike për arbitrimin, ndërsa çështja ka shkaktuar polemika të mëdha në futbollin spanjoll.

Për tifozët madrilenë, pankarta ishte një tjetër mënyrë për të shprehur pakënaqësinë ndaj drejtuesve të futbollit spanjoll dhe asaj që ata e konsiderojnë mungesë transparence.

Me El Clásicon që po afrohet, përplasja mes dy gjigantëve spanjollë po zhvillohet jo vetëm në fushë, por edhe jashtë saj, në një klimë të mbushur me akuza dhe polemika.