A ka për qëllim të kandidohet për president, tregon vet Pacolli

Kryetari i AKR-së, Behgjet Pacolli, ka thënë se ende është herët të flitet për zgjedhjen e presidentit të ri të vendit.

Në një intervistë për klankosova.tv për këtë temë që është aktualizuar së fundmi, ai ka theksuar së nuk mëton shpalljen e kandidaturës për Zyrën e Presidentit.

“Unë nuk kam shpallur asnjë kandidaturë për pozitën e Presidentit të Republikës dhe asnjë nga komentet e bëra nuk janë bërë nga unë”, është shprehur Pacolli.

“Nuk kam bërë ndonjë njoftim apo qëllim për kandidaturën Presidenciale, nuk është koha të flasim për çështje të tilla dhe të gjitha partitë politike duhet të kenë një dialog për zgjedhjen e Presidentit.

Për të në këtë fazë më me rëndësi janë temat tjera si përballja me pandeminë, rimëkëmbja ekonomike dhe dialogu me Serbinë.

“Aktualisht kemi një President që po bën punën e tij dhe nuk i bëjmë nder vendit dhe as institucionit të Presidentit nëse fillojmë tani të flasim për zgjedhjen e Presidentit, kur kemi mjaft kohë dhe duhet të punojmë në çështje të ngutshme si pandemia, dialogu me Serbinë ose situata ekonomike. Le të punojmë në këto çështje dhe kur të vijë koha le të ndërtojmë konsensus përmes një dialogu shumëpartiakë”.

Deri kur t’i skadojë mandati Hashim Thaçit në shkurtin e 2021-ës, sipas Pacollit duhet pritur të gjithë tok.

“Le të presim kohën të vijë për të zgjedhur Presidentin dhe të gjitha partitë politike përmes dialogut të adresojnë këtë çështje, duke mos shikuar interesat personale dhe grupore, por interesat e Kosovës në këto kohë të vështira dhe sfiduese për vendin”.