Abazi: Nuk e di pse u ftua policia në objektin e postës, bordi në agjendë s’kishte shkarkime

Disa zyrtarë policorë janë parë afër objektit të Postës, ndërsa aty planifikohej të mbahej një mbledhje e Bordit të Telekomit.

Në media u raportua se arsye e prezencës së policisë aty ishte shkarkimi i menaxhmentit të lartë të Telekomit, mirëpo një gjë e tillë u demantua nga zëdhënësi i kësaj ndërmarrjeje,  Menduh Abazi, shkruan lajmi.net.

Ai para medieve tha se nuk ka pasur kërkesë për shkarkimin e dikujt. Ai thotë se nuk e di kush e ka ftuar policinë, por që  sipas tij kushdo që e ka bërë këtë, ka bërë një gabim të madh.

“Nuk ka pas asnjë kërkesë për shkarkim të askujt. Kushdo që e ka ftuar policinë, ka bërë një gabim shumë të madh, sepse na e kujton kohën e represionit. Kushdo që e ka bërë këtë, ka shkaktuar probleme shumë të mëdha. Nëse kryeministri i vendit bën çdo ditë deklarata për ndaljen e gjakderdhjes financiare, atëherë a po bëhet një gjakderdhje tjetër”, ka thënë Abazi.

Abazi tha po ashtu se nuk e di se cilat janë arsyet pse nuk është mbajtur mbledhja, por që sipas tij, nëse do të ketë agjendë për shkarkim, menaxhmenti është i gatshëm të tërhiqet.

“Nëse ka agjendë politike për shkarkim, menaxhmenti është i gatshëm me u tërhek, por jo me u frikësu. Se pse nuk është mbajtur mbledhja, nuk e di. Pra, nuk ka pasur agjendë shkarkimi”, tha në fund ai.