Agim Bahtiri flet për Sveçlën e Gjuriqin: Shumë zhurmë për asgjë

Kryetari i Mitrovicës Agim Bahtiri ka reaguar lidhur me një fotografi ku shihet anëtari i VV-së, Xhelal Sveçla, i ulut në tavolinë me drejtorin e të ashtuquajturës Zyrë për Kosovë ne Qeverinë e Serbisë, Marko Gjuriq.

Sipas Bahtirit u bë “shumë zhurmë për asgjë”.

Përmes një shkrimi në Facebook ai tha se Sveçla mori pjesë në një takim zyrtar të organizuar nga miqtë ndërkombëtar dhe se ishte aty për ta përfaqësuar dhe mbrojtur Kosovën.

“Xhelali ishte prezent aty edhe pse ishin prezent përfaqësuesit e Serbisë, por këtë e bëri për ta përfaqësuar dhe mbrojtur Kosovën, sepse tash si parti fituese Vetëvendosje ka përgjegjësi edhe më të mëdha shtetërore. Por nuk ishte aty për ta ndarë Kosovën, siç bëri përpjekje PDK-ja dhe një pjesë tjetër e klasës politike të Kosovës për shumë kohë. Përderisa këta që po kritikojnë janë takuar fshehtazi për ndarjen e Kosovës deri në Mitrovicë, Xhelali mori pjesë në një takim zyrtar të organizuar nga miqt ndërkombëtar. Nuk mund ta kritikojnë Xhelalin e as VV-së këta që i falen Malit të zi 8200 hektarë tokë të Kosovës”.

“Për dallim prej tyre, Xhelali nuk ulet për të biseduar ndarjen e Kosovës, sepse ai as nuk blihet e as nuk shitet, as nuk mund të shantazhohet e as kërcënohet, sepse është i pastër si loti në aspektin privat e zyrtar. PAN-it po i dhemb se marrëveshja për koalicion do të arrihet javën që vjen, andaj nuk po lën guri pa lëvizur për ta penguar formimin e Qeverisë Kurti. Njëjtë siç dështuan ta ndalin fitoren e VV-së, ashtu do të dështojnë ta pengojnë formimin e Qeverisë Kurti” ka shkruar Bahtiri.