Banorët e Napolit kaluan natën jashtë pas tërmetit

Shumë njerëz në qytetin italian të Napolit dhe në rrethinën e tij e kanë kaluar natën në rrugë dhe në makinat e tyre pas një tërmeti që tronditi ndërtesat dhe shkaktoi rrënoja.

Sizmologët italianë thanë se të enjten tërmeti me magnitudë 4.4 goditi në orën 01:25, sipas kohës lokale, në një thellësi të cekët prej tre kilometrash.

Furnizimi me energji elektrike në disa pjesë të Napolit u ndërpre, shkruan BBC.

Në qytetin e afërt të Pozzuoli, pranë epiqendrës së tërmetit, një person i lënduar u nxor nga rrënojat e një shtëpie pjesërisht të shembur.

Napoli ndodhet në Fushat Phlegraean, një pellg vullkanik që e bën zonën në Italinë jugore të prirur ndaj tërmeteve.

Tërmeti i së enjtes është ndjerë në disa zona të rajonit të Campania, raportojnë mediat italiane.

Lëkundjet u pasuan nga të paktën dy pasgoditje më të dobëta.

Njerëzit më pas u panë duke lënë shtëpitë e tyre dhe duke u mbledhur në rrugët e Napolit, nga frika e më shumë lëkundjeve.

Një qendër e koordinimit të shpëtimit ka shkuar për të vlerësuar dëmet.

Shkollat ​​në Pozzuoli dhe dy lagje aty pranë do të mbyllen të enjten në mënyrë që të mund të kryhen kontrolle të stabilitetit të ndërtesave, raportoi gazeta Corriere Della Sera.