Brenda vilës luksoze ku jetonte Enver Hoxha

E përditshmja britanike “The Guardian”, i ka kushtuar një artikull vilës tre katëshe të liderit komunist të Shqipërisë, Enver Hoxha, i cili vdiq në vitin 1985, transmeton Gazeta Metro.

Sipas prestigjiozes britanike, asokohe, Hoxha sundonte me diktaturë staliniste, në vendin që e kish shndërruar në një prej më të izoluarve dhe më represivëve në botë.

Në kohën e komunizmit, e gjithë kjo zonë ku gjendet shtëpia, ka qenë e izoluar nga policia e agjend sekretë, të cilët kujdeseshin për elitën e partisë dhe familjet e tyre.

Kurse sot, blloku është zona më e frekuentuar e Tiranës, e mbushur me lokale e klube nate.

E në mesin e gjithë këtyre, ka mbetur shtëpia e Hoxhës, e cila është e paprekur dhe e mbyllur për publikun.

Brenda saj, muret janë dekoruar me art socialist, shumë dhoma janë pajisur me televizorë shqiptarë të vjetër, dyert e dhomës së gjumit të diktatorit kanë veshje që izolon tingujt ndërsa në bodrum, ka një pishinë dhe një derë sekrete që çon në një tunel në të cilin Hoxha “paranojak” mund të largohej në rast sulmi.

Kryeministri Edi Rama, nënvizon “Guardian”, po mendon prej kohësh për dilemën se çfarë duhet të bëjë me shtëpinë, pasi edhe druhet se do të ishte njësoj e papërshtatshme si mbajtja në gjendjen aktuale, ashtu edhe shkatërrimi i plotë.

“Është e vështirë të gjesh një zgjidhje të mirë, kur e shkuara është ende aty por ti i shërben të ardhmes”, thotë ai.

“Guardian” shkruan se edhe ndërtesa të tjera që simbolizojnë regjimin e Hoxhës janë rikonceptuar për përdorim publik, ndër të cilat edhe zyrat qendrore të sigurimit, që tani janë kthyer në muze. Po ashtu edhe bunkerët. Tani, janë aktuale ndërkohë planet për të transformuar piramidën e ndërtuar në fund të viteve 80 si një muze për diktatorin e ndjerë. Por pavarësisht planeve të mëdha, nuk ka ende një monument të denjë për viktimat e Hoxhës.