Dukagjini i thellon krizën Prishtinës – Malisheva ‘demolon’ Feronikelin

Dukagjini ka marrë një fitore të madhe ndaj kampionit të Kosovës, Prishtina, derisa Malisheva pa problem ka mposhtur Feronikelin, ndeshje të zhvilluara në në kuadër të xhiros së 23-të në Superligën e Kosovës.

Ndeshja ndërmjet Dukagjinit dhe Prishtinës, ishte interesante, ku dy skuadrat kishin raste të shumta, por rezultati përfundimtar doli të jetë 2:1, shkruan lajmi.net.

Mentor Zhdrella hapi serinë e golave duke shënuar pas një gabimi amatorest të portierit Ardit Nika (9′).

Prishtina pastaj u rikthye në lojë përmes Mendurim Hotit që shënoi nga afërsia (17′).

Mirëpo, para përfundimit të pjesës së parë, Dukagjini gjeti sërish golin, ku Dallku u tregua i saktë nga pika e bardhë (44′).

Në pjesën e dytë, dy skuadrat zhvilluan lojë me aksione të shumta, por që u mungoi finalizimi i aksioneve.

Kësisoj, me këtë humbje, Prishtina bie në pozitën e gjashtë me 26 pikë, derisa Dukagjini ngritët në të tetën me 24 sosh.

Ndërkohë, në ndeshjen tjetër, Malisheva ka ‘shpartalluar’ Feronikelin duke e mposhtur me rezultat të thellë 6:1.

Mysafirët kaluan fillimisht në epërsi pas një goli të Xhylanit, derisa ishte Mërgim Pefqeli që barazoi rezultatin në fundin e kësaj pjesë (43′).

Në 45-minutëshin e dytë, skuadra e Arsim Thaqit hyri me tjetër fytyrë në fushë, ku realizuan edhe pesë gola.

Ishte Marc-Olivier që vendosi Malishevën në epërsi në minutën e 55-të, derisa Agon Xhaka shënoi të tretin në takim (69′).

Vetëm dy minuta më vonë, Ronald Sobowale u përkujdes për golin e katërt (71′), derisa i njëjti shënoi sërish për rezultatin prej 5:1.

Fitoren e Malishevës e vulosi Ilir Mustafa me një eurogol nga distanca (87′).

Me këtë fitore, Malisheva renditët në pozitën e gjashtë me 26 pikë, derisa Feronikeli qëndron në fund me 11 sosh.