FSK disa herë ndër vite ka qenë me aksione humanitare në veri

Forca e Sigurisë së Kosovës (FSK) ka zbarkuar në një aksion humanitar në veri në kuadër të kërkimeve për trupin e një 33-vjeçari që dyshohet se është mbytur në Liqenin e Ujmanit.

Ky nuk është rasti i parë që FSK ndërhyn në pjesën veriore të Kosovës për qëllime humanitare.

Njësitë e FSK-së kishin zhvilluar disa operacione të ngjashme vite më parë.

Më 15 korrik 2024, FSK ishte angazhuar në Liqenin e Ujmanit me Njësinë e Kërkim Shpëtimit me dy kamion, dy barka.

Incidenti për gjetjen e katër të rinjve serbë, ku dy barka motorike ishin ndeshur mes vete.

Në vitin 2016, FSK-ja mori pjesë në gjetje të një serbi në Lumin Ibër.

Kurse, në vitin 2019, FSK-ja kishte marrë pjesë në një intervenim deminimi në veri bashkë me KFOR-in.

Vetëvendosje, përmes një postimi në rrjete sociale, ka theksuar se ky është një moment i rëndësishëm pasi, sipas tyre, është hera e parë që FSK si ushtri ndërhyn në veri.

Ata kanë shpërndarë edhe një postim të ministrit në detyrë të Mbrojtjes, Ejup Maqedonci.

Më herët, Vetëvendosje kishte kritikuar një letër-zotim të ish-kryeministrit Hashim Thaçi, sipas së cilës FSK nuk mund të dislokohej në veri pa miratim paraprak nga KFOR-i.

Madje, kryeministri Albin Kurti e kishte dërguar këtë letër në Prokurori si pjesë e një debati institucional për kufizimet që ajo përmbante.

Sipas marrëveshjes së vitit 2013 mes Qeverisë së Kosovës dhe NATO-s, angazhimi i FSK-së në veri lejohet vetëm me pëlqimin e KFOR-it – një marrëveshje që ende mbetet në fuqi, pavarësisht reformave në mandatin dhe transformimin e FSK-së në ushtri.