Garë shumë e fortë në edicionin e 21-të të “Sportistit të Vitit”

Për vitin në të cilin përfaqësuesja e Kosovës në futboll ka arritur rezultate të mëdha dhe xhudistet kanë fituar plot medalje në kampionat botëror e Lojëra Evropiane, gara për çmimin e sportistit më të mirë është shumë e fortë. Grupi KOHA, sipas traditës, shpall më të mirët e vitit, në ceremoninë që tashmë shërben si matës për palët e tjera që shpallin më të mirët në sport.

Ceremonia “Sportisti i Vitit 2019” e Grupit KOHA do të mbahet të hënën (sot)nga ora 19:30 në hotelin “Emerald” në afërsi të Prishtinës. Është ky edicioni i 21-të i ceremonisë “Sportisti i Vitit”. Grupi KOHA mburret me traditën më të gjatë të vlerësimit të sportistëve në fund të vitit. Për herë të parë gazeta “Koha Ditore” kishte vlerësuar atletin Zijadin Kryeziu si sportist të vitit 1997.

Në vitet 1998 e 1999, për shkak të luftës nuk u shpall sportisti i vitit, por ceremonia vazhdoi prej vitit 2000 tashmë së bashku me televizionin KTV. Besnik Hasi fitoi çmimin në vitin 2000 e Kushtrim Munishi në vitin 2001. Luan Krasniqi ishte më i miri në vitin 2002 e më pas nisi të shpallej edhe sportistja e vitit krahas sportistit. Nga dy fitues ishin deri në vitin 2008 e më pas Majlinda Kelmendi kishte dominim të plotë për tre vjet. Në vitin 2012 Majlinda u nxor nga konkurrenca dhe kështu u hap rrugë për dominim të xhudistes tjetër, Nora Gjakova dhe basketbollistit Dardan Berisha. Nora ka fituar shtatë herë rresht, kurse Dardan Berisha ka fituar katër çmime në shtatë vjetët e fundit. Vjet fitues ishin Nora Gjakova dhe vëllai i saj, Akil Gjakova, po ashtu xhudist.

Në edicionin e 20-të konkurrenca ishte e fortë, por edhe më e fortë është për edicionin e 21-të. Në Lojërat Evropiane xhudistet kosovare kanë fituar tri medalje. Tri medalje janë fituar edhe në Botërorin e xhudos për seniorë. Xhudistët kanë vazhduar të fitojnë medalje edhe në kategori të reja në ngjarjet më të mëdha.

Famën këtë vit megjithatë e kishte përfaqësuesja në futboll që pati kampanjë të suksesshme në eliminatoret për “Euro 2020”, ndonëse nuk siguroi kualifikimin. Kosova ka shënuar fitore ndaj Çekisë, Malit të Zi e Bullgarisë, ndërsa është paraqitur fuqishëm edhe ndaj Anglisë. Klubet e futbollit kanë mbetur në nivel të njëjtë, ndërsa ka pasur avancim nga klubi i futbollisteve.

Ka pasur suksese edhe në sportet e tjera. Përmes hendbollit, Kosova për herë të parë ka garuar në Botëror në sportet ekipore. Bëhet fjalë për Botërorin e juniorëve të mbajtur në Spanjë në verë. Ka pasur suksese edhe në atletikë, boks, basketboll e sporte të tjera.

Rrjedhimisht gara për çmimet kryesore, ato të sportistëve të vitit, është shumë e fortë. Por edhe te të rinjtë gara do të jetë e fortë, njëjtë si për klubet. Sipas traditës, përmes çmimeve të veçanta, Grupi KOHA nderon personalitetet që japin kontribut të madh për sportin dhe që e kanë bërë këtë në të kaluarën. Prej çmimeve kryesore është ai që mban emrin e kampiones olimpike, Majlinda Kelmendi. KOHA ka themeluar çmim me emrin e Majlindës për të nderuar veprën e saj e përmes kësaj edhe personalitete të tjera të sportit.

Nominimet për kandidatët nëpër kategori i bëjnë redaksitë e sportit në “Koha Ditore” dhe KTV. Ndërsa më të mirët përzgjidhen nga juria profesionale, e përbërë nga emra të respektuar të sportit e po ashtu nga një përfaqësues i redaksive të gazetës dhe televizionit.

Fituesit e deritashëm

1997: Zijadin Kryeziu

2000: Besnik Hasi

2001: Kushtrim Munishi

2002: Luan Krasniqi

2003: Afrim Latifi – Kaltrinë Krasniqi

2004: Luan Krasniqi – Besire Domaniku

2005: Luan Krasniqi – Majlinda Kelmendi

2006: Habib Ademi – Daulina Osmani

2007: Arben Muqolli – Majlinda Kelmendi

2008: Visar Berisha – Majlinda Kelmendi

2009: Majlinda Kelmendi

2010: Majlinda Kelmendi

2011: Majlinda Kelmendi

2012: Nora Gjakova – Shpëtim Idrizi

2013: Nora Gjakova – Dardan Berisha

2014: Nora Gjakova – Dardan Berisha

2015: Nora Gjakova – Dardan Berisha

2016: Nora Gjakova – Herolind Nishevci

2017: Nora Gjakova – Dardan Berisha

2018: Nora Gjakova – Akil Gjakova

Të nominuarit për ceremoninë “Sportisti i Vitit 2019”

Sportisti më i mirë i ri i vitit:

Melos Gashi (karate)

Muhamet Ramadani (atletikë)

Jon Muqolli (hendboll)

Sportistja më e mirë e re e vitit:

Albulena Gërvalla (karate)

Laura Fazliu (xhudo)

Kaltrina Biqkaj (futboll)

Klubi më i mirë i vitit (meshkujt):

Besa Famgas (hendboll)

Feronikeli (futboll)

Sigal Prishtina (basketboll)

Klubi më i mirë i vitit (femrat):

Mabetex Prishtina (basketboll)

Mitrovica (futboll)

Istogu (hendboll)

Sportisti i vitit:

Akil Gjakova (xhudo)

Vedat Muriqi (futboll)

Patriot Behrami (boks)

Deniz Terziqi (hendboll)

Dardan Berisha (basketboll)

Sportistja më e mirë e vitit:

Nora Gjakova (xhudo)

Distria Kransiqi (xhudo)

Loriana Kuka (xhudo)

Leonora Demaj (hendboll)

Liridona Syla (futboll)

Fituesit e vitit të kaluar

Sportistja më e mirë e vitit: Nora Gjakova (xhudo)

Sportisti më i mirë i vitit: Akil Gjakova (xhudo)

Sportistja më e mirë e re e vitit: Erza Muminoviq (xhudo)

Sportisti më i mirë i ri i vitit: Shpat Zeka (xhudo)

Klubi më i mirë i vitit te femrat: Istogu (hendboll)

Klubi më i mirë i vitit te meshkujt: Drita (futboll)

Çmimi “Majlinda Kelmendi”, post-mortem: Fadil Vokrri

Sportisti i vitit sipas votimit në internet: Majlinda Kelmendi

Punëtori sportiv i vitit: Driton Kuka

Mirënjohje e Veçantë: Përfaqësuesja në futboll & Bernard Challandes

Mirënjohje për Vepër Jetësore: Ajet Shosholli