Haziri: Nëse nuk zgjidhet edhe çështja e Presidentit me LVV-në, LDK shkon në opozitë

Nënkryetari i Lidhjes Demokratike të Kosovës (LDK) dhe kryetari i Gjlanit, Lutfi Haziri ka thënë se mes LDK-së dhe VV-së janë pritur situata të tilla ku do të ketë mosmarrëveshje.

Haziri në RTV Dukagjini, ka thënë se edhe disa probleme që janë mes LDK-së dhe VV-së do të tejkalohen nga dy liderët e këtyre subjekteve.

“Janë disa opsione që janë diskutuar dhe liderët janë duke u munduar të adaptojnë rolin e partive të tyre. Secili e ka të qartë se nuk merr më shumë se ajo që i takon”, tha ai, përcjell Telegrafi.

Nënkryetari i Lidhjes Demokratike të Kosovës (LDK) ka thënë se nuk kanë arritur në një pikë që të thuhet “merre ose lë”.

Haziri ka thënë se “partisë së parë i takon të ofrojë opsionin e fundit “merre ose le”.

Sipas tij nëse VV thotë se ka ardhur ai moment, ne do të vendosim për pozicionin tonë.

Haziri ka thënë se nëse Vetëvendosje nuk pranon të zgjidhet tani çështja e presidentit LDK do të shkojë në opozitë.

“Ne nuk pranojmë opsione të tjera të zgjidhjes së problemit, që del jashtë këtij formati të bisedimeve”.

Haziri ka thënë se personalisht nuk ka ambicie për president apo ndonjë post qeveritar pasi sipas tij ka obligime ndaj qytetarëve të Gjilanit.
__________

Haziri: Jemi afër përmbylljes së marrëveshjes me Vetëvendosjen

Nënkryetari i LDK-së, Lutfi Haziri ka thënë se janë duke u marrë vesh për arritjen e koalicionit me Lëvizjen Vetëvendosje, duke e pranuar edhe se çështja e zgjedhjes së presidentit është zotim që duhet të bëhet mes partnerëve të koalicionit.

Haziri ka thënë se me LVV nuk kanë folur asnjëherë për emrin e presidentit.

“Nuk po paragjykojmë për postin e presidentit. Ne s’po themi që lideri i Vetëvendosjes ka me qenë president. Asnjëherë s’kemi fol për një emër të presidentit. Isa Mustafa ka thënë se është nder ta përfundojë karrierën politike si kryeministër ose president, veçanërisht si president. VV do të binden se s’ka qeverisje stabile nëse nuk qartësohen të gjitha çështjet që kanë interes për këtë vend. Pse ne duhet të bëjmë kompromise? Partia e parë duhet të jetë më gjeneroze. I madhi duhet të bëjë kompromise”, ka thënë Haziri në Klan Kosova.

Ai ka bërë të ditur se janë afër përmbylljes së marrëveshjes.

“Parimet e ndarjes së përgjegjësive kanë përfunduar, tash veç ndarja e përgjegjësive në institucione dhe emrat e ministrave të rinj, kështu që është hapi i fundit që do të definojë gjithçka. Jemi në formulë por është çështje ditësh besoj”, ka theksuar ai.

Ndërkaq, sa i përket organizimit të zgjedhjeve të reja në rast të mos arritjes së bërjes së koalicionit, Haziri u shpreh se “nëse keni krijuar pritje të mëdha tek qytetarët, atëherë kjo mund të kthehet në një zhgënjim të madh”.

“LDK nuk merret me kontrabandë politike. Nuk jemi plastelinë qe thyhemi dhe riformatohemi. LDK i ka dhënë mbështetje këtij koalicioni politikisht me gjithë mbështetjen e saj, përndryshe nuk pranojmë të bëhemi solucion i formulave të ndryshme. Nuk ka kushtëzim për postin e presidentit, por është zotim që duhet të merret. Mënyra se si do të arrihet marrëveshja ka me pas rëndësi shumë. Tek qeveria janë dakord që Kurti të jetë kandidat për kryeministër, për Kuvend janë dakord që dikush nga palët VV-LDK, pra terminologjia është e qartë. Për presidentin thuhet zotim që palët të pajtohen për këtë post”, ka deklaruar Haziri.