KE-ja siguron 500 mijë komplete Remdesivir, edhe Kosova mund t’i porosis ato

Komisioni Evropian ka thënë se ka arritur një marrëveshje me kompaninë farmaceutike “Gilead” për të blerë 500,000 komplete trajtuese të “Remdesivir”-it.

Ende asnjë trajtim nuk është dëshmuar se parandalon sëmundjen e rëndë pas infektimit me koronavirus, por ilaçi antiviral, i njohur edhe me emrin komercial “Veklury”, ka ndihmuar disa pacientë me COVID-19 të rikuperohen më shpejtë.

“Remdesivir” është aprovuar si trajtues për koronavirusin nga Komisioni në muajin korrik.

Organi ekzekutiv i BE-së thotë se kontrata e përbashkët e prokurimit është nënshkruar nga 36 pjesëmarrës, përfshirë të gjitha 27 shtetet anëtare të BE-së dhe Britaninë e Madhe. Marrëveshja do t’u mundësojë vendeve të blejnë ilaçin për përdorim emergjent apo edhe për nevoja rezervë, ka thënë kompania “Gilead”.

“Sot sigurojmë qasjen ndaj ‘Remdesivirit’ për trajtimin e rreth 500,000 pacientëve në nevojë”, tha Stella Kyriakides, Komisionerja për Shëndetësi dhe Siguri në Ushqim.

Në mesin e nënshkruesve të kësaj kontrate, veç 27 shteteve anëtare të BE-së dhe Britanisë së Madhe, është edhe Kosova.

Po ashtu, janë edhe Norvegjia e Islanda, pastaj Shqipëria, Maqedonia e Veriut, Mali i Zi, Bosnja e Hercegovina dhe Serbia.

“Të gjitha vendet pjesëmarrëse tani mund t’i bëjnë porositë e tyre për të prokuruar ‘Veklury’-n direkt. ‘Veklury’ në këtë fazë është i vetmi ilaç i autorizuar nga BE-ja për trajtimin e pacientëve me COVID-19 që kanë nevojë për oksigjen”, thuhet në njoftimin e KE-së.