Kurti i hapë rrugë protestës së VV-së – ndryshon vendimin që ndalonte tubimet në hapësirat publike e private

Qeveria në detyrë e Kosovës, ka miratuar vendimin për hapjen e xhamive dhe kishave në tërë territorin e Kosovës.

Në mbledhjen e mbajtur në orët e mbrëmjes, përveç vendimit për hapjen e xhamive dhe kishave, ka marrë vendim edhe për shpronësimin e disa pronave për ndërtimin e pikë-kalimit kufitar mes Kosovës dhe Maqedonisë së Veriut.

“Kryeministri në detyrë i Qeverisë së Republikës së Kosovës, Albin Kurti, në pajtim me Rregulloren e Punës së Qeverisë ka thirr mbledhjen korresponduese, në të cilën është miratuar vendimi i propozuar nga Ministria e Shëndetësisë për rihapjen e faltoreve dhe një vendim për shpronësime shtesë të pronave që preken nga ndërtimi i pikë-kalimit kufitar mes Republikës së Kosovës dhe Republikës së Maqedonisë së Veriut, në Stançiq të Komunës së Gjilanit”, thuhet në njoftimin e ekzekutivit.

Po ashtu në këtë mbledhje, Qeveria e Kosovës me kërkesën e Ministrisë së Shëndetësisë ka bërë plotësimin dhe ndryshimin e vendimit të Qeverisë sipas të cilit ishin ndaluar tubimet në të gjitha hapësirat publike dhe private.

“Me plotësimet dhe ndryshimet e miratuara bëhet rihapja e xhamive dhe kishave për numër të reduktuar të besimtarëve në raport me sipërfaqet e këtyre faltoreve. Faltoret në këtë rast obligohen që t’ju përmbahen rekomandimeve të IKSHP-së dhe OBSh-së për ruajtje të distancës, përdorimin e maskave dhe të higjienës personale”, thuhet në njoftim.

Gjithashtu, në këtë mbledhje, Qeveria ka miratuar vendimin përfundimtar për shpronësimin shtesë për interes publik të pronave të paluajtshme të cilat preken nga ndërtimi i objektit të pikë-kalimit kufitar mes Republikës së Kosovës dhe Maqedonisë së Veriut, në Stançiq të Komunës së Gjilanit.