Kurti u uron festën e Pashkëve besimtarëve ortodoksë

Kryeministri Albin Kurti i ka uruar besimtarët ortodoksë për festën e Pashkëve.

“Këtë pranverë, në këtë kremtim, urojmë që shpresa dhe jeta të triumfojë mbi gjithçka, që ndihma ta mbizotërojë egoizmin, që e drejta ta largojë të keqen, së bashku dhe me vullnetin dhe përpjekjen e të gjithëve.”, ka shkruar Kurti në llogarinë e tij në Facebook.

Postimi i plotë:

Për shumë mot Pashkën.

Sot besimtarët ortodoksë kremtojnë Pashkën. I trokasin vezët e kuqe në ndërrimin e së shtunës me të dielën dhe urojnë njëri-tjetrin për fillim të ri, në përqafime gëzimi për ringjalljen e shpresës.

Ju uroj qytetarëve tanë të besimit ortodoks Pashkë të gëzuar!
Për çdo vit në pranverë, sipas traditës mijëvjeçare, besimtarët me familjet dhe miqtë e tyre pas kreshmës 40 ditore, kremtojnë javën e shenjtë që kulmon me Pashkën ditën e diel.

Këtë pranverë, në këtë kremtim, urojmë që shpresa dhe jeta të triumfojë mbi gjithçka, që ndihma ta mbizotërojë egoizmin, që e drejta ta largojë të keqen, së bashku dhe me vullnetin dhe përpjekjen e të gjithëve.
Dashuria do ta mposhtë përfundimisht urrejtjen.

Pashkë të bekuar!