Kush janë dy vëllezërit berberë që për 22 vjet i qethin ushtarët e KFOR-it?

E as të vetmit që merren me prerjen e flokëve.

Por, Ibrahim dhe Ismail Hoxhalar mund të krenohen se pakkush mbase edhe në botë mund ta ketë përvojën e tyre unike për vendin dhe kohëzgjatjen e ushtrimit të zanatit aty.

Për më shumë se 22 vjet, këta dy kosovarë kujdesen për prerjen e flokëve të ushtarëve të NATO-s që u vendosën këtu më 1999, pas bombardimeve 78 ditore që i dhanë fund represionit serb.

Misioni KFOR përbëhet nga ushtarë prej rreth 30 vendeve që flasin gjuhë shumë të ndryshme. E në këso rrethana, dy vëllezërit i mësuan disa prej tyre. Kështu, ata flasin gjermanisht, anglisht, italisht e polonisht në mënyrë që të komunikojnë sa më detajisht me klientët e tyre për modelet e qethjes së flokëve, por edhe të jenë më të afërt me ta.

“Ne jemi shumë të lumtur dhe na pëlqen të punojmë me KFOR-in. Gjatë ditës ne i flasim disa gjuhë me njerëz nga shtete dhe kultura të ndryshme” , thotë Ibrahimi, për faqen e ushtrisë amerikane Army.mil, përcjell Klankosova.tv. “Nëse myshterinjtë tanë janë të lumtur, edhe ne jemi të lumtur.”

Vëllezërit Hoxhalar, në lokalin e tyre në kampin ushtarak në Novosellë (Foto: Army.mil)

Vëllezërit nga Prizreni këtë zanat e kanë trashëgim familjar për më shumë se 58 vjet. Babai i tyre që kishte nisur punën me dyçan në vitin 1964, i kishte mësuar ata të prenin flokët qysh në moshën 12 vjeç njërin, e 15 tjetrin.

Por, punën me babain e lanë në vitin 2000, kur baza e KFOR-it e hapur në qytetin e tyre kërkonte berberë për ushtarët që ishin aty me detyrë. E kur u mbyll ajo më 2018, ata u transferuan në kampin e Novosellës për ku udhëtojnë cdo ditë pune.