Liderët botërorë mblidhen në Zvicër për Ukrainën

Dhjetëra liderë botërorë janë mbledhur në Zvicër të shtunën në përpjekje për ta gjetur një mënyrë për t’i dhënë fund luftës mbi dyvjeçare në Ukrainë.

Më shumë se 90 shtete dhe institucione botërore marrin pjesë në samit. Zvicra shpreson se ky samit mund të prodhojë skicën e parë për paqe.

Është tubimi më i madh për Ukrainën që prej nisjes së luftës atje, raportoi BBC. Megjithatë, pa Kinën dhe Rusinë në tryezë, pritjet për përparim të theksuar janë të ulëta. Rusia nuk është ftuar.

Nënpresidentja amerikane, Kamala Harris, dhe liderët e Francës, Gjermanisë, Kanadasë, Italisë, Britanisë së Madhe dhe Japonisë, janë në mesin e atyre që pritet të marrin pjesë.

Presidentja e Kosovës, Vjosa Osmani, po ashtu do të marrë pjesë në këtë samit.

Para samitit, Grupi i Shtatë (G7) vendeve më të industrializuara u pajtua t’ia japë Kievit një hua prej 50 miliardë dollarësh duke përdorur asetet e ngrira ruse.

Më vonë, presidenti i Shteteve të Bashkuara, Joe Biden, dhe presidenti ukrainas, Volodymyr Zelensky, e nënshkruan një marrëveshje sigurie 10-vjeçare, të cilën ata e përshëndetën si një moment historik në marrëdhëniet midis vendeve të tyre.