Maloku: Deputetët s’e kanë merituar votën tonë

Sociologu e analisti Fadil Maloku është shprehur edhe njëherë tejet kritik për jetën parlamentare në Kosovë.

Për të, “degradimi i jetës parlamentare, është edhe një dëshmi se kjo garniturë dhe profil i deputetëve aktualë është shndërruar në një grumbull mediokrish pa gjykime dhe vendime të interesit publik”.

Sepse, sipas tij, “vetëm kur janë në pyetje pagat dhe mëditjet e tyre të majme, ata shkojnë në parlament”.

“Ligjvënësit kosovarë, pa opozitë, pa debate pro et contra, pra, edhe pa ndërgjegje për peshën dhe rëndësinë e tyre aty, me sjelljet indolente dhe injorante, vetëm sa po e dëshmojnë injorancën dhe hipokrizinë që po e bëjnë në dëm jo vetëm të elektoratit të vetë, po edhe gjithë qytetarisë në tempullin e demokracisë”, ka thënë Maloku.

Maloku ka thënë tutje se po shihet “që këta deputet s’e kanë merituar as vëmendjen e as votën tonë”.

“Ata, me papërgjegjësinë e dëshmuar injorante vetëm sa po e ridëshmojnë nevojën e një legjitimimi të ri politik te qytetari”, ka thënë Maloku, teksa ka shtuar se ky legalitet assesi s’duhet të ndodhë pa u reformuar tri gjëra.

“Ligji ekzistues zgjedhor, i cili në të gjitha zgjedhjet e gjertanishme lokale dhe ato nacionale rekrutoi vetëm imbecilë, konformistë e tipa tejet servilë ndaj shefit partiak, në këmbim të besnikërisë dhe lojalitetit ndaj sovranit; pa u ndryshuar, mentaliteti dhe sjellja ndaj obligimeve shtetërore e kombëtare; pa, ushtruar një ‘verifikim’ paraprak social të kandidatëve potencialë për parlamentin e ardhshëm”.