Mbyllen 4 lokale të natës në Pejë

Policia e Kosovës dje ka mbyllur 4 lokale të natës në zonën e Pejës.

Përmes një komunikate për media, policia ka njoftuar se pasi ka pranuar disa informacione se fillimisht në një lokal nate në dalje të qytetit, dyshohet se zhvilloheshin veprimtari të kundërligjshme, prostitucion, persona të kërkuar nga gjykatat dhe armëmbajtje pa leje, përcjell lajmi.net.

Njoftimi i plotë:

Me datën 11 maj 2019, duke filluar nga ora 23:30, në zonën e Pejës, Policia ka zbatuar planin operativ të koduar ‘Kontrollimi i lokaleve 2019’.

Policia e Kosovës ka pranuar disa informacione se fillimisht në një lokal nate në dalje të qytetit, dyshohet se zhvilloheshin veprimtari të kundërligjshme, prostitucion, persona të kërkuar nga gjykatat dhe armëmbajtje pa leje.

Njësia e Hetimeve, Stacioni Policor në Pejë, në bashkëpunim me Prokurorinë Themelore në Pejë, kanë marrë urdhrin nga Gjykata Themelore në Pejë, për kontroll-bastisje të lokalit dhe shtëpisë së dyshimtë, në fsh. Vitomiricë.

Gjatë bastisjes Policia ka hasur personin D.S. m/k/sh, i (lindur) 1969, i cili ishte në kërkim nga Gjykata themelore ne Mitrovicë, i njëjti është arrestuar për të vazhduar me procedura te mëtutjeshme. Në këtë lokal janë bastisur të gjithë të pranishmit dhe veturat ne parkingun e këtij lokali, me ç’rast nuk është gjetur asgjë e dyshimtë.

Vlen të ceket se gjatë kontrollit të mjetit tip ‘Hyunday’ tek pronari i cili nuk ka pasur dokumente të veturës, andaj Njësiti i komunikacionit rrugor ka ndërmarrë masat e nevojshme dhe mjetin e ka dërguar ne terminal doganor.

Në këtë plan kanë qenë të përfshirë Stacioni Policor në Pejë, Njësiti i reagimit të shpejtë, Njësiti i komunikacionit rrugor, Njësiti për hetimin e trafikimit të qenieve njerëzore.

Gjatë këtij kontrolli deri në ora 03:00 të datës 12.05.2019 janë mbyllur 4- (katër) lokale të natës në zonën e Pejës.