Mitsotakis: Përgjigje evropiane ndaj rritjes së çmimeve të energjisë

Në një samit katërpalësh të mbajtur në Romë me homologët e tij italian, spanjoll dhe portugez, kryeministri grek, Kyriakos Mitsotakis tha se takimi ishte një hap i rëndësishëm drejt formulimit të një përgjigjeje evropiane ndaj rritjes dramatike të çmimeve të energjisë.

“Është bindja jonë e përbashkët që përballja me një sfidë të tillë kërkon një përgjigje të përbashkët evropiane. Veprime, me fjalë të tjera, për të mbrojtur shoqëritë tona, pasi asnjë vend nuk mund ta përballojë i vetëm këtë krizë”, tha ai.

Ai vuri në dukje se “rritja e çmimeve në sektorin e energjisë” përbën një “çështje kryesore për ekonomitë tona dhe kohezionin social të popujve tanë”.

Mitsotakis mori pjesë në takim përmes telekonferencës pasi aktualisht është në izolim për shkak të një diagnoze të fundit me Covid-19.

Morën pjesë personalisht kryeministri spanjoll Pedro Sanchez dhe ai portugez Antonio Costa, ndërsa takimi u drejtua nga kryeministri italian Mario Draghi.

“Ne jemi dakord që zgjidhjet nuk mund të jenë vetëm kombëtare”, tha Mitsotakis duke shtuar se “në fazën fillestare, ne propozojmë që të ketë politika të harmonizuara evropiane të ndërhyrjes kundër spekulantëve, në mënyrë që të rivendoset ekuilibri në çmimet e energjisë elektrike dhe gazit natyror”.

”Duhet të merren vendime të menjëhershme në Këshillin e ardhshëm Evropian”, vuri në dukje kryeministri grek dhe Evropa duhet të formojë një front të bashkuar./ANA/