Mospunësimi i 20 bursistëve të BE-së në institucione, rrezikon përkrahjen

Albian Krasniqi, me të përfunduar studimet në Angli, shtatorin e vitit të kaluar u kthye në Kosovë.

Që nga atëherë, Krasniqi, i cili është përfitues i programit Skema e Profesionistëve të Rinj, është duke pritur për një vend pune në institucionet e Kosovës, raporton KTV.

Në bazë të marrëveshjes me Zyrën e BE-së e cila financon këtë program, bursistët duhet të kthehen në Kosovë dhe të punësohen në administratën publike.

Krasniqi është i zhgënjyer me institucionet e Kosovës.

Mosgatishmëria e institucioneve për punësimin e këtyre bursistëve po ndikon në dekurajimin e gjeneratave të tjera.

Edhe rreth 20 bursistë nga 50 që vitin e kaluar kanë përfunduar studimet në kuadër të këtij programi, janë të papunësuar.

Zyra e Bashkimit Evropian, në një përgjigje për Kohën Ditore, ka thënë se mos-zbatimi në tërësi i marrëveshjes, mund të rrezikojë programin.

“Sipas kontratës që e ka BE-ja me Qeverinë, është obligim i Qeverisë së Kosovës t’i punësojë të gjithë të diplomuarit e Skemës së Profesionistëve të Rinj. Mospërmbushja e këtij obligimi mund të shpjerë drejt rishikimit të fondeve sipas programit ose rialokimit të fondeve të parapara për skemën e të diplomuarve të ardhshëm”, thuhet në përgjigjen e Zyrës së BE-së.

KTV-ja ka pyetur për zbatimin e kësaj marrëveshjeje Qeverinë e Kosovës, por nuk ka marrë përgjigje gjatë ditës.