Mourinho ka disa kushte për klubin e tij të ardhshëm

Jose Mourinho ka zbuluar se në punën e tij të ardhshme, si trajner i ndonjë klubi, ai do të punojë vetëm me njerëz të cilët i do.

Strategu portugez ka mbetur pa punë si trajner, që nga dhjetori, kur u shkarkua nga pozita e trajnerit të Manchester Unitedit, transmeton Gazeta Express.

Ai i ka drejtuar një numër të klubeve më të mëdha të Evropës gjatë karrierës së tij, përfshirë këtu Chelsean, Real Madridin, Interin, si dhe, së fundi, “Djajtë e kuq”.

Mourinho ka bërë të ditur se ai veçse e ka refuzuar një klub për shkak të mungesës së ambicies së tyre, duke shtuar se klubi i tij i radhës do të jetë me njerëz me të cilën atij i pëlqen të punojë.

“Nëse është një klub, pa ambicie, unë nuk do ta pranoj. Unë e refuzova sepse dua të jem në futbollin e nivelit më të lartë dhe në një klub me ambicie të nivelit më të lartë”, ka thënë Mourinho.

“Ky është kushti im i dytë. Kushti im i parë ka të bëjë me empatinë strukturore. Dua të punoj me njerëz që i dua. Njerëzit me të cilët dua të punoj, me të cilën do të jem i lumtur të punoj, me të cilët i ndajmë të njëjta ide”.

“Këtë gjë e kisha në Inter. Ka klube të tilla. Natyrisht, kjo është një pjesë shumë e rëndësishme e një klubi”.