Fjalë Kyçe

Osmani shpreh gatishmëri për të ndihmuar Luginën e Preshevës: Brengë e jona e përhershme

Osmani shpreh gatishmëri për të ndihmuar Luginën e Preshevës: Brengë e jona e përhershme

Presidentja e Kosovës, Vjosa Osmani, sot priti në takim një delegacion të Këshillit Kombëtar Shqiptar për Luginën e Preshevës, të përbërë nga Ragmi Mustafi, Lirona Zuka dhe Alban Alili.

Në takim me këtë delegacion, Osmani ka shprehur gatishmëri për ta mbështetur Këshillin Kombëtar Shqiptar të Luginës së Preshevës, njofton Klan Kosova.

Gjithashtu, ajo ka bërë të ditur se në vazhdimësi angazhohet për promovimin e të drejtave të shqiptarëve në Preshevë, Medvegjë e Bujanovc dhe ka adresuar problemet, me të cilat ballafaqohen këta qytetarë, siç janë pasivizimi i adresave, mosnjohja e diplomave nga Serbia dhe problemet e vazhdueshme me punësimin.

“E keni mbështetjen time dhe ju siguroj se do të përpiqem që zëri juaj të dëgjohet. Qytetarët e Luginës së Preshevës janë brengë e jona e përhershme dhe do të ndërmarrim çdo veprim të mundshëm për t’i ndihmuar sa më shumë”, ka theksuar Osmani, duke u zotuar se problemet e shqiptarëve të Luginës së Preshevës do të vazhdojë t’i ngritë në instancat më të larta ndërkombëtare.