Panda gjigante në kopshtin zoologjik francez lind dy këlyshe binjake

Një panda gjigante e huazuar në Francë nga Kina, lindi këlyshë binjakë femra të hënën në mëngjes, njoftoi një kopsht zoologjik francez, duke deklaruar se “ato janë shumë të gjalla, ngjyrë rozë dhe të shëndetshme”.

Kopshti Zoologjik Beauval, në jug të Parisit, tha se binjaket kanë lindur pak pas orës 1 të mëngjesit. Ato peshojnë 149 dhe 129 gram.

Nëna e tyre Huan Huan dhe babai Yuan Zi janë në Beauval të marra me hua 10-vjeçare nga Kina dhe synojnë të nxjerrin në pah lidhjet e mira me Francën. Binjaket janë këlyshët e tyre të dytë dhe të tretë pas pandës së parë të lindur në Francë, Yuan Meng, në 2017.

“Huan Huan po kujdeset shumë mirë për ta. Ajo i mori në gojë për t’i lëpirë dhe pastruar. Ne mund të dëgjojmë ca piskatje të vogla, ” tha kopshti zoologjik në një deklaratë.

Kopshti zoologjik tha se gjinia e këlyshëve u përcaktua nga ekspertët kinezë përgjegjës për t’u kujdesur për ta, por do të duhet të konfirmohet përfundimisht pasi organet gjenitale të jashtme nuk shfaqen derisa këlyshët e pandës të jenë disa muajsh.

Lindjet vijnë pasi kopshti zoologjik njoftoi me gëzim të madh në mars se Huan Huan dhe Yuan Zi ishin “bashkuar tetë herë”. Veterinerët më pas kryen një mbarësim artificial “për të pasur sa më shumë mundësi” për të parë një shtatzëni.

Pandat gjigante kanë vështirësi në mbarështim dhe shtatzënitë e tyre janë jashtëzakonisht të vështira për t’u ndjekur.

“Ne thjesht jetuam një moment me intensitet të rrallë. Këto lindje janë gjithmonë shumë të jashtëzakonshme, por ato sjellin edhe disa surpriza, ”tha Delphine Delord, drejtoreshë e kopshtit zoologjik Beauval.

Këlysheve nuk do t’u vihen emra pa mbushur 100 ditë. Ata do të kalojnë disa vjet në Francë para se të dërgohen në Kinë, tha kopshti zoologjik.

Kombet e tjera në Evropë gjithashtu kanë panda gjigante, përfshirë Austrinë, Britaninë, Belgjikën, Gjermaninë, Holandën, Spanjën dhe Finlandën.

Janë rreth 1,800 panda që jetojnë në natyrë në Kinë dhe rreth 500 në robëri në të gjithë botën.

Kina për dekada të tëra ua dhuroi kombeve miqësore, maskotën e saj jozyrtare kombëtare në atë që njihet si “diplomaci panda”. Kohët e fundit vendi i ka huazuar pandat kopshteve zoologjike me kontrata tregtare.