Pas Vlora Çitakut, pritet kthimi edhe i 46 diplomatëve që u ka kaluar mandati

46 diplomatë të Kosovës do të kthehen në shtëpi, përfundojnë misionin e shërbimit diplomatik. Vlora Çitaku do të merre rrugën për në Kosovë posa që në vend të saj të emërohet ambasadori i ri në Uashington.

E misionin e diplomatit sipas një liste që ka siguruar televizioni do të përfundojnë edhe 45 gra e burra tjerë. Fatmire Musliu, Lirim Grajçevci, Shota Bukoshi, Faton Kallaba, Ylber Hysa, Mimoza Ahmetaj e të tjerët pritet të kthehen në shtëpi.

Gjithë këtyre iu ka skaduar mandati i shërbimit si diplomat në shtetet ku e kanë përfaqësuar Kosovën. Televizioni ka kërkuar sqarime për këtë çështje nga Ministria e Punëve të Jashtme, por nuk ka marrë përgjigje gjatë ditës.

Ndërkohë që kjo ministri ka hapur konkurs për nëpunës konsullor, e në mesin e atyre që kanë aplikuar figurojnë emra të afërt me politikën.

Anëtarja e Partisë Socialdemokrate, Shqipe Pantina është në listë të pritjes për tu emëruar ambasadore në Japoni. Televizioni e ka kontaktuar Pantinën por kjo e fundit nuk ka pranuar të flasë.

Ndërkohë T7 ka provuar të kontaktojë edhe me ish deputeten e PSD-së, Aida Dërgutin e bashkëshorten e ish kryeministrit, Anita Haradinaj. Por që të dyja kanë qenë të pa qasshme.

Këtë konkurs po e kritikojnë në Lëvizjen Vetëvendosje. Sipas tyre MPJ nuk ka pasur miratimin e Administratës Publike. Tutje Ahmeti e komenton edhe emërimin e personazheve politike në postë diplomatike.

Kurse njohësi i politikës së jashtme në Demokraci plus, Emir Abrashi ka kritika për kuotat e përfaqësimit. Kthimin e disa diplomatëve në Kosovë e kishte kërkuar edhe ish-ministri i Punëve të Jashtme, Glauk Konjufca.