Partia Demokratike e Kosovës përmes një komunikatë në Facebook ka njoftuar se të premten ka parashtruar padi kundër vendimit të Zyrës së Rregullatorit të Energjisë për tarifat e reja të energjisë elektrike për konsumatorët familjarë, ndërsa ka iniciuar komision parlamentar, për siç pretendojnë, keqpërdorimin e dhjetëra miliona eurove nga Qeveria.
“Vendimi i ZRRE-së, meriton shqyrtim gjyqësor në gjykatën kompetente, pos tjerash, edhe për faktin e mos përfshirjes në strukturën e re tarifore të pagesës së energjisë elektrike – të katër komunave veriore, duke diskriminuar kështu qytetarët e pjesës tjetër të vendit. ZRRE, duke mos përfshirë në strukturën e re tarifore të pagesës së energjisë elektrike, katër komunat veriore, përveç diskrimimit mbi bazën e vendbanimit, ka kontribuar në mënyrë të drejtpërdrejtë edhe në cenimin e parimit të sundimit të ligjit dhe shtrirjes së sovranitetit shtetëror në pjesën veriore të shtetit. Vendimi i kontestuar, po ashtu ka të meta në pikëpamje të plotësimit të kushteve ligjore të procedurës administrative të cilat sigurisht do të argumentohen dhe provohen në procedurën kontestimore në Gjykatë”, thuhet në komunikatë.
Partia opozitare thotë se në komisionin parlamentar do të hetohen, vendimet, veprimet dhe mosveprimet e Qeverisë dhe institucioneve të tjera në raport me menaxhimin e sektorit të energjisë.
“Vendimi i Partisë Demokratike të Kosovës për të paditur Zyrën e Rregullatorit të Energjisë, vjen pasi Grupi Parlamentar ka parashtruar edhe kërkesën për themelimin e komisionit hetimor parlamentar, në të cilin do të hetohen vendimet, veprimet dhe mosveprimet e Qeverisë dhe institucioneve të tjera, në raport me menaxhimin e sektorit të energjisë, veçanërisht në muajt e krizës energjetike në të cilën u keqpërdorën dhjetëra miliona euro, pa plan, pa strategji, pa transparencë dhe në mënyrë të kundërligjshme”, përfundon komunikata.