Përmbushet pika e parë e marrëveshjes së Brukselit për targat (VIDEO)

KFOR-i tashmë është vendosur në pikat kufitare në Jarinjë dhe Bërnjak dhe atje më nuk ka as barrikada të protestuesve, madje nga atje janë larguar edhe Njësia Speciale e Kosovës.

Me këtë rast, është përmbushur pika e parë e marrëveshjes mes Kosovës dhe Serbisë e arritur në Bruksel, njofton Klankosova.tv.

Zbatimi i kësaj marrëveshjeje ka nisur qysh në orën 8:00 të mëngjesit të sotëm, ndërkaq e tërë situata në veri kishte filluar 13 ditë më parë.

Koha që u caktua sipas marrëveshjes brenda së cilës serbët që po mbanin të bllokuar rrugët për Jarinjë e Bërnjak të largoheshin, ishte tetë orë.

Tërheqja e Njësisë Speciale në Jarinjë:

Kjo është pika e përmbushur e marrëveshjes:

1.Sipas marrëveshjes, forcat e Njësisë Speciale të vendosura në Jarinjë e Bërnjak do të largohen njëkohësisht me bllokadat në rrugë më 2 tetor, nga ora 8:00 dhe kjo do të përfundojë maksimalisht deri në orën 16:00. KFOR-i do të vendoset në Jarinjë e Bërnjak para se të nisë largimi i sinkronizuar dhe do të qëndrojnë për dy javë për të mbajtur ambient të sigurt dhe lëvizje të lirë. (E përmbushur)

Dy pikat e tjera për të cilat u arrit marrëveshja:

2.Nga 4 tetori, ora 8:00, hyn në fuqi regjimi i letrave ngjitëse (mbulimi i simboleve shtetërore), në pajtim me kornizën e dialogut të ndihmuar nga BE-ja dhe do të aplikohet si masë e përkohshme derisa të vendoset një masë e përhershme.

3.Do të krijohet një grup punues i përbërë nga përfaqësues të BE-së dhe palët e Beogradit e Prishtinës, e do të kryesohet nga BE-ja, për të gjetur një zgjidhje të përhershme për çështjen e targave të bazuara në standardet dhe praktikat e BE-së. Takimi i parë i Grupit Punues do të mbahet më 21 tetor në Bruksel. Brenda gjashtë muajve nga takimi i parë, Grupi Punues do të paraqesë zbulimet e saj për një zgjidhje të përhershme te formati i nivelit të lartë të Dialogut.