Një pishinë në Mitrovicë ka paralajmëruar se sonte do të hapet dhe organizoi një ndejë nga ora 19:00, duke kundërshtuar hapur kështu masat parandaluese të vendosura nga Qeveria e Kosovës.
Është pishina “Mrizi i Zanave”, në Mitrovicë që ka njoftuar se sonte do të mbahet një “Poolparty nga ora 19:00, ndërsa ju ka bërë thirrje qytetarëve ta vizitojnë, pasi siç thotë kanë mbetur edhe pak vende të lira, shkruan Reporteri.net.
Nga ora 20:00 kanë paralajmëruar se do të ketë edhe këngëtarë.
Ky organizim i paralajmëruar nga drejtuesit e kësaj pishine është kundër masave të qeverisë, pasi që pas orës 22:30 ndalohet çdo lëvizje përveç personave me leje të veçantë.
Qeveria e Kosovës si masë parandaluese për përhapjen e koronavirusit ka mbyllur disa biznese e në mesin e tyre edhe pishinat të cilat nuk i përmbahen rregullave të IKSHPK-së.
Madje në ditët e fundit disa pishina janë mbyllur për shkak se kanë punuar kundër rekomandimeve të IKSHPK-së, ndërkaq gjatë së hënës pronarët e pishinave kanë protestuar para ndërtesës së Qeverisë së Kosovës kundër masave të marra.