Presidenti Ademi dhe Zhegrova dhurata për fëmijët në SOS Fshat, HANDIKOS dhe Down Syndrome Kosova

Presidenti Agim Ademi në shoqëri të nënkryetarit Bakir Burri, drejtorit të Kombëtares, Muharrem Sahiti, kapitenit të Kombëtares së veteranëve, Sylejman Selimi, futbollistit të Kombëtares, Edon Zhegrova dhe kryetarit të tifo-grupit “Dardanët”, Lulzim Berisha, në kuadër të festave të fundvitit, sot, kanë vizituar SOS Fshatin në Prishtinë, shoqatën HANDIKOS dhe shoqatën Down Syndrome Kosova, me ç’rast kanë bërë edhe shpërndarjen e dhuratave modeste.

Gjatë vizitës në SOS Fshat, presidenti Ademi shprehur mirënjohje për drejtuesit dhe stafin e kësaj qendre për punën dhe përkushtimin që kanë për fëmijët e moshave të ndryshme, e të cilët për shkaqe e arsye të ndryshme kanë mbetur pa përkujdesjen prindërore.

Ai theksoi se kjo vizitë përveç shpërndarjes së dhuratave për fëmijët ka edhe qëllimin e bashkëpunimit ndërmjet dy institucioneve, me qëllim që fëmijët që janë pjesë e SOS Fshatit të kenë qasje edhe në aktivitetet e ndryshme të futbollit.

“Ne e vlerësojmë jashtëzakonisht shumë punën dhe veprimtarinë tuaj dhe e konsiderojmë atë si mision të shenjtë, sepse vërtet është i tillë. Ne, si institucion i futbollit jemi të gatshëm të ju ndihmojmë në çdo aspekt që kemi mundësi dhe që ju e shihni të nevojshme. Pra, dera e FFK-së për ju do të jetë gjithmonë e hapur. Të gjithë ata fëmijë që kanë talent dhe dëshirë për të qenë pjesë e futbollit ne jemi të gatshëm që t’ju ndihmojmë që t’ua realizoni ëndrrën. Para pak kohësh kemi investuar në fushën e stadiumit ‘Rilindja’ edhe në saje të bashkëpunimit që keni ju me këtë klub. Pra, sa i përket aspektit sportiv jemi çdo herë të gatshëm të ju ndihmojmë dhe të jemi afër fëmijëve që janë pjesë e kësaj shtëpie të madhe, sepse sigurisht se në të ardhmen nga këtu do të kemi edhe ndonjë sportist të madh”, ka thënë presidenti Ademi./express