Qytetarët brohorasin para kishës serbe në Prizren ‘Kosova është zemra e Shqipërisë’

Tifozët prizrenas u kanë reaguar vizitorëve serbë, që të shtunën kishin bërë thirrje “Kosova është Serbi” nëpër rrugët e Prizrenit. Disa tifozë kanë bërë thirrje “Kosova, zemra e Shqipërisë” në Prizren, në afërsi të Kishës së Shën Premtes.

“Arpagjikët” thonë se ky është reagim ndaj thirrjeve të djeshme të serbëve në këtë qytet. Brohoritje “Kosovo je Serbia” (shqip: “Kosova është Serbi”) janë dëgjuar dje në qytetin e Prizrenit.

Te Kisha e Shën Premtes, e njohur si Kisha e Levishës, është mbajtur ajo që është dukur të jetë një ceremoni festive nga një grup serbësh. Ata janë fotografuar rreth orës 15, teksa po këndonin këngë provokuese dhe po mohonin pavarësinë e Kosovës.

Qarkullimi i automjete në rrugën ku ndodhet kisha ortodokse serbe është ndaluar për rreth 15 minuta nga Policia e Kosovës, kanë treguar dëshmitarët.

Zyrtarë të PK-së e ruajnë vazhdimisht Kishën e Levishës, që ndodhet në zonën historike të Prizrenit. Kjo kishë ishte shndërruar në xhami, para se xhamia të bëhej përsëri kishë.
https://www.facebook.com/241102339261487/videos/2803374503243711