Rama thotë se fitorja ishte historike: Nga sot askush nuk do të guxojë të djegë mandate e të hedhë molotov

Rama thotë se fitorja ishte historike: Nga sot askush nuk do të guxojë të djegë mandate e të hedhë molotov

Gazeta Express
30 Qershor 2019 21:13
Që në nisje të fjalës së tij, kryeministri Edi Rama është shprehur se këtë të dielë u arrit një fitore historike.

Rama është shprehur se nga sot e tutje asnjë parti politike nuk do të guxojë më të djegë mandatet.

Rama: Sot fitoi qytetaria, shteti, shpresa. Humbi me të drejtë dhe turp, Shqipëria e djeshme e politikës pa din dhe pa imam. Ishte një fitore e vështirë, ku vetë nuk e mbaj mend më të vështirë.

Sot, 30 qershori që dukej sikur nuk do të vinte kurrë, po ikën paqësisht duke marrë me vete pasigurinë sociale dhe kaosin institucional. Një falënderim për miqtë dhe partnerët e Shqipërisë, e cila u godit por nuk u shkund. Faleminderit SHBA-ve dhe përfaqësisë së saj në Tiranë, faleminderit BE-së dhe delegacionit, faleminderit misionit të OSBE-së dhe çdokujt tjetër që dha një dorë për këtë betejë sa të rëndë dhe absurde për një vend të NATO-s. Jo vetëm faleminderit por edhe ndjesë kurjto prej miqve të huaj që u bë objekt i sulmeve, nga ato poshtë shtëpisë tek faqet online.

Pas pak, hyn një ditë e re që e gjen Shqipërinë të çliruar nga makthi. Por sigurisht dita e re vjen me barrën e rëndë të sfidës së kurimit, që hija përçarëse ka lënë prapa akoma.

Zgjedhësit e këtij vendi nuk e meritojnë tërë atë presion kriminal e mizerabël ndaj tyre. Ky vend nuk e meritonte tërë atë llum që u hodh në pasqyrat mediatike të botës. Të një qameti që nuk ndodhi.. Por qytetarët shqiptarë e bënë të tyren. Ata folën si s’ka më qartë e si s’ka më bukur.

Qoftë, duke shkuar të votojnë, ose qoftë duke shkuar të mos votojnë, ata folën me zërin e paqes dhe e kthyen qytetarisht ditën e paralajmëruar të qametit, në një ditë krejt normale të diele. Ku edhe çetat, molotovët i kishin zëvendësuar me fizarmonika dhe lehjet i kishin zëvendësuar me thirrje për zgjedhjet të prezumuara moniste.

Pas pak fillon një ditë e re, ku ne përfaqësuesit e vullnetit të rikonfirmuar të popullit do duhet të bëjmë më shumë dhe të tregohemi edhe më të përulur.

Nga sot, opozita nuk do të shohë më bojkot mandatesh, molotovë apo largim nga zgjedhjet. Nga sot, mësimi i atyre që guxuan ta marrin këtë aventurë, është jo vetëm për ata një mësim, por një mësim për të gjitha partitë politike, përgjithmonë.