SHBA thotë se përkrah vetëm Kosovën sovrane, jo bashkimin me Shqipërinë

Programe të pashtjelluara mirë dhe të mbushura me premtime që nuk ofrojnë zgjidhje afatgjatë për problemet kryesore kanë shpërndarë partitë politike në 10 ditët e fushatës parazgjedhore. Pjesë e diskursit ishte edhe karta e bashkimit me Shqipërinë, të cilën e promovoi kandidati i Aleancës për president, Ramush Haradinaj. Ai u çoi mesazh edhe aleatëve që nëse nuk e pranojnë Kosovën në NATO, do të shikohen alternativa të tjera.

Por një zëdhënës i Ambasadës amerikane në Prishtinë, në ditën e fundit të fushatës, e ka bërë të qartë nëpërmjet “Kohës” se mbështesin vetëm Kosovën sovrane dhe multietnike.

“Ne mbështesim një Kosovë sovrane, të pavarur, multietnike. Diversiteti është një vlerë themelore që ne e ndajmë me Kosovën dhe kjo është e theksuar në Kushtetutën e saj. Mesazhi ynë mbi integrimin aktual dhe të ardhshëm të Kosovës në institucionet perëndimore ka qenë i qëndrueshëm dhe i qartë: Shtetet e Bashkuara do të mbesin pranë Kosovës ndërsa ajo vazhdon të ecë përpara në rrugën e saj euroatlantike”, kanë thënë nga kjo ambasadë.

Në fushatë u zhvillua edhe një betejë mes PDK-së e Nismës se kush i mbron vlerat e UÇK-së.

Subjektet e tjera hezituan të flasin për temat që i presin kur të vijnë në qeveri – siç janë politika e jashtme dhe dialogu me Serbinë. Në programin prej 52 faqesh, Lëvizja Vetëvendosje kurrkund nuk i përmend bisedimet me shtetin serb.

E Lidhja Demokratike vazhdoi ta proklamojë veten si forca e cila riktheu partneritetin me SHBA-në.

Vëzhgues të fushatës parazgjedhore thonë se premtimet e partive janë të parealizueshme edhe nëse arrijnë ta çojnë në fund një mandat të plotë.

“Nga ajo që kemi monitoruar, gjasat e mëdha janë që asnjëra prej partive politike të mos ketë mundësi ta zbatojë gjithë programin e tyre, marrë parasysh se ka nevoja shumë të mëdha. Programet nuk janë në proporcion me atë që kërkohet. Premtimet e kandidatëve për kryeministër dhe programet në përgjithësi i tejkalojnë edhe limitet buxhetore në të shumtën e rasteve”, ka deklaruar Allen Meta nga D4D.

“Programe ka pasur secili subjekt, por shumë vonë kanë filluar t’i bëjnë publike, në kuptimin e asaj që nëse ke dashtë me iu qas një programi nuk ke pasur mundësi. Pas ditës së pestë apo të gjashtë kanë filluar me u shfaq publikisht programet e disa subjekteve. Çka kemi pa është se kanë qenë tema të zakonshme, si: arsimi, shëndetësia, mungesa e punësimit për të rinjtë. Në disa raste kanë qenë edhe integrimi evropian dhe liberalizimi i vizave”, është shprehur Florent Spahija i KDI-së.

Edhe Grupi për Studime Juridike dhe Politike (GLPS) programet i ka quajtur të mangëta, të pashtjelluara mirë dhe jokonkrete.

Megjithëse është përmendur mosrespektimi i masave anti-Covid, Ambasada e Shteteve të Bashkuara ka kërkuar që pandemia të mos jetë justifikim për abstenim nga votimi.

“Ndërsa është e rëndësishme që të gjithë qytetarët të kenë mundësi t’i ndajnë mendimet e tyre dhe të marrin pjesë në procesin demokratik, ne kërkojmë që këtë ta bëjnë në mënyrë të sigurt. Gjatë fushatës shumë pak njerëz janë duke respektuar masat themelore shëndetësore – për të qëndruar në shtëpi dhe shmangur tubimet e mëdha, duke mbajtur maskën dhe respektuar distancën. Ju lutem mos lejoni që kjo pandemi të jetë justifikim që të mos luani rolin tuaj në vazhdimin e ndërtimit të demokracisë dhe institucioneve të Kosovës. Ju lutemi dilni dhe votoni, por bëjeni atë në mënyrë të sigurt. E ardhmja e Kosovës është në duart tuaja. Ndërsa Ambasada dhe partnerët tanë ndërkombëtarë mbesin thellësisht të angazhuar, në fund të fundit, varet nga institucionet e Kosovës dhe nga populli i Kosovës për t’u siguruar që zgjedhjet të jenë të lira, të drejta dhe paqësore”, ka thënë zëdhënësi i ambasadës amerikane.

Këtë të diel mbahen zgjedhjet e parakohshme – të tetat me radhë që nga paslufta.