Shkarkohet kryeshefi i Stacionit të Autobusëve, Luan Hoti

Kryeshefi ekzekutiv i Stacionit të Autobusëve, Luan Hoti, është shkarkuar nga pozita e tij.

Vendimi për shkarkimin e tij është marrë të enjten, ndërkaq lidhur me shkarkimin ka shkruar edhe Hoti në Facebook.

Hoti ishte emëruar në pozitën e kryeshefit të Stacionit të Autobusëve më 30 janar të vitit 2019.

Postimi i plotë i Hotit:

Kujdes, bonu i dëgjueshëm se të shkarkojmë!

Nëse në krye të një ndërmarrje publike, zgjedhësh pa mbështetje politike, por me konkurs i mbikëqyrur nga Ambasade Britanike, tregon performancë të shkëlqyeshme pas afër 3 vitesh. Pas, 20 vitesh paraqet bilanc pozitiv, lufton krimin e organizuar, eliminon keqperdorimet, eliminon nepotizmin, nuk punëson askënd dhe bordit ua prish kombinimet politike ruanu se ata të SHKARKOJNË.
Bordet politike nuk janë mësuar kështu! Ata duan të punësojnë të afërmit e tyre pa konkurs, duan që të shpenzojnë paren publike pa mbulesë të organizojnë workshope në Durrës pa nevojë, dhe nëse nuk je i dëgjueshëm të SHKARKOJNË. Sepse Aksionarët si pronarë legjitim nuk e mbrojnë pasurinë publike sipas detyrës fiduciare. Poshtu edhe anëtarët e bordit nuk bëjnë asgje dhe marrin kompensim të majmë, një shumë shumë më e lartë se rroga mesatare në vend. Anëtarët e bordit emërohen sipas preferences personale të aksionarëve pa asnjë përvojë paraprake dhe duke mos i plotësuar kushtet për drejtor të bordit. Emërojnë zyrtarët të lartë në mënyre kundërligjore pa i përmbushë kriteret e konkursit publik, e punësojnë familjarin dhe shokë të udhëheqësve të lartë, punësojnë shokë të vllaznive, shokë nga studime të cilët janë të dëgjueshëm dhe i rrespektojnë urdhërat nga lartë.
Kjo është Prishtina jonë e sotme. Pleqtë thojshin Kali para se me cofë fillon me qit shkelma. Kështu është edhe kjo udhëheqje e Prishtinës.
Jam i bindur se një ditë do të ngadhënjejë drejtësia dhe ata që shkelin ligjin do të përgjigjen para drejtësisë.