Shtyhet rezultati përfundimtar për tekste të reja

Rezultatet përfundimtare të fituesve të teksteve shkollore nuk pritet të shpallen javët në vijim.

Një gjë e tillë, siç merr vesh Koha Ditore, është shtyrë në afat të pacaktuar, ndonëse ka qenë e paraparë të ndodhë këtë javë. Kjo shtyrje, sipas burimeve, është bërë për shkak të pakënaqësive të shumta të shtëpive botuese.

Ministria e Arsimit nuk i është përgjigjur gazetës se kur do të dalin rezultatet përfundimtare.

Rezultatet preliminare të teksteve shkollore u shpallën javë më parë. Fituesja më e madhe doli shtëpia botuese “Dukagjini”.

Grupi KOHA ka raportuar javën e kaluar për pakënaqësitë e shumta që ka nxitur ky proces tek shtëpitë e tjera botuese.

Brenda një muaji kanë dhënë dorëheqje dy anëtarët e Këshillit të Ekspertëve për Programe dhe Tekste Shkollore (KEPTSH), Fadil Grajçevci dhe Sefer Avdiaj. Pakënaqësitë e tyre lidheshin me emërimin e recensentëve, me punën e tyre jo të bazuar në legjislacionin në fuqi dhe me shpalljen e rezultateve nga MASHT-i pa raport përfundimtar të Këshillit.