Sot më shumë të shëruar se të infektuar, nuk respektohen masat

Inspektorati sanitar, këtë javë është duke bërë inspektimin e sektorit të gastronomisë, për të parë nëse janë duke u respektuar masat e Ministrisë së Shëndetësisë.

Sipas zëdhënësit të Agjencisë së Ushqimit dhe Veterinarisë, të gjithë inspektorët janë duke punuar me gjithë kapacitetin për të parë nëse qytetarët e edhe bizneset janë duke vepruar në bazë të rregullave, raporton KOHA.

E pa asnjë masë mbrojtëse, e pa distancë sociale, qytetarë të shumtë janë parë këtë të mërkurë, në kafenetë e Prishtinës.

Situatë e njëjtë ishte edhe në qytetin e Fushë-Kosovës, ku ditë më parë u konfirmuan 5 raste me koronavirus, njëri prej të cilëve zyrtar në Policinë e Kosovës.

Në anën tjetër, në Klinikën Infektive këtë të martë po trajtohen 21 persona, prej tyre 11 pozitivë me COVID-19. Sipas kësaj klinike, 1 pacient vazhdon të jetë në gjendje të rëndë shëndetësore.

Edhe 19 raste të reja me COVID-19 janë konfirmuar këtë të mërkurë, në Kosovë, duke e çuar numrin në mbi 1 mijë e 130, kurse prej tyre janë shëruar rreth 870 persona.

Sipas, IKSHPK-së, rastet pozitive janë raste kontakti 14 nga komuna e Vushtrrisë, dhe nga një rast në komunën e Fushë Kosovës, Obiliqit, Podujevës, Kamenicës e atë të Mitrovicës.