Suso në shitje? Giampaolo befason me fjalët e tij

Trajneri i Milanit, Marco Giampaolo, ka folur para nisjes për në Boston, ku Milani do të përgatitet për turneun amerikan që do t’i vërë përballë Bayernit dhe Benficas.

15 ditë te Milani: “Ditë ku kemi bërë një punë shumë të mirë, me lojtarë kuriozë dhe që kanë qenë totalisht në dispozicion, pa bërë zë. Jam i kënaqur nga gjithçka”.

Ndërtimi i skuadrës: “Kam shumë besim te drejtuesit, jam i vetëdijshëm që duhet kohë. Situata optimale është të punohet me një grup të krijuar që në fillim, por nuk ankohem”.

Suso: “Është treguar i gatshëm të provohet në rolin e mesfushorit të avancuar, pas dy sulmuesve. E ka bërë shumë mirë, është lojtar që ka vizion të shkëlqyer loje, di ta kalojë kundërshtarin dhe jam shumë i kënaqur prej tij. Suso është lojtar shumë i fortë, mund të bëjë diferencën. Zhvillimet e merkatos dhe situatat që qëndrojnë mbi mua nuk më interesojnë dhe nuk duhet të flas unë. Flisni me Maldinin, Bobanin, Massaran. Unë tani kam 22 lojtarë dhe mundohem të marr më të mirën prej tyre”.

Cutrone: “E kam takuar, nuk e kam stërvitur ende. Do duhet të punojë me një ritëm të caktuar dhe do të shohim, ditë pas dite”.

Merkato: “Shpresojmë të mbarojë para 2 shtatorit. Unë mendoj për punën në fushë, merkatoja nuk më intereson shumë”.

Modric: “Duhet të pyesni Maldinin”.

Bennacer: “Sapo ka fituar Kupën e Afrikës, për pjesën tjetër nuk mund të flas”.