Të infektuarit nga Gjilani e Obiliqi, punonjës shëndetësorë në Prishtinë

Dy nga tetë të regjistruarit si të infektuar me koronavirus të shtunën janë punonjës shëndetësore në Prishtinë. Lajmi është bërë i ditur nga kryetarët e Gjilanit dhe të Obiliqit, që njoftuan se rastet e së shtunës janë të dy punëtorë shëndetësorë në spitale private në kryeqytet.

Kryetari i Gjilanit, Lutfi Haziri, ka thënë se rasti i punonjëses nga Gjilani, që punon në një spital privat në Prishtinë, është rast i izoluar dhe “Qendra Rajonale e Shëndetit Publik dhe emergjencat civile e kanë nën mbikëqyrje”.

“IKSHP na njoftoi për një rast të ri me #Covid19 në Gjilan. Bëhet fjalë për një punonjëse në një spital privat në Prishtinë. Rasti është i izoluar dhe Qendra Rajonale e Shëndetit Publik dhe emergjencat civile e kanë nën mbikëqyrje”, ka shkruar ai në Facebook.

Edhe kreu i Obiliqit, Xhafer Gashi, ka thënë se rasti nga kjo komunë është punonjës shëndetësor në një klinikë private në kryeqytet.

“Sipas informatave të marra nga Instituti Kombëtar i Shëndetësisë Publike, në Obiliq kemi një rast pozitiv me Covid-19, rasti në fjalë është rast kontakti dhe sipas informatave është punonjës shëndetësor në një klinikë private në Prishtinë. Ekipet e QKMF-së, po qëndrojnë në kontakt me IKSHPK-në dhe me familjarët e të infektuarit”, thuhet në një komunikatë të komunës së Obiliqit. “Nuk ka nevojë për panik, ju bëjë thirrje shumë të sinqertë që të respektoni me përpikëri të gjitha rregullat e institucioneve shëndetësore, të vazhdoni të qëndroni në shtëpi edhe përkundër motit të mirë, evitoni daljet e shpeshta në mënyrë që të tejkalojmë këtë sfidë!”

Nuk dihet nëse të dy janë punonjës të të njëjtit spital privat.

Të shtunën, në nivel vendi u regjistruan tetë raste të reja me Covid-19. Sipas njoftimit nga Instituti Kombëtar i Shëndetësisë Publike në Kosovë tri raste ishin nga komuna e Prishtinës, dy nga Mitrovica e nga një ishin nga Obiliqi, Fushë Kosova e Gjilani.

Pas lajmërimit nga IKSHPK-ja për rastet e reja në Prishtinë, kreu i kryeqytetit, Shpend Ahmeti, bëri thirrje për kujdes të shtuar që të mos bëhet një vatër e re e koronavirusit në kryeqytet. Sipas tij, një vatër e re do të kthente në masa më të rrepta.