“Termet” në Madrid, largohet edhe Benzema

Pavarësisht se trajneri i Real Madridit, Carlo Ancelotti pak orë më parë deklaroi se Karim Benzema nuk do të largohet nga ‘Bernabue’, megjithatë, sulmuesi francez ka vendosur të largohet nga ‘Los Blancos’.

Klubi ‘Mbretëror’ përmes një njoftimi, ka konfirmuar largimin e Benzemas, i cili pas 14 vitesh mbyll aventurën tek gjiganti spanjoll.

“Real Madrid C. F. dhe kapiteni ynë Karim Benzema kanë rënë dakord t’i japin fund fazës së tyre të shkëlqyer dhe të paharrueshme si lojtar i klubit tonë. Real Madridi dëshiron të tregojë mirënjohjen dhe gjithë dashurinë e tij ndaj atij që tashmë është një nga legjendat tona më të mëdha. Karim Benzema erdhi në klubin tonë në vitin 2009, kur ishte vetëm 21 vjeç dhe ka qenë një lojtar themelor në këtë epokë të artë të historisë sonë. Gjatë 14 sezoneve në të cilat ai ka mbrojtur logon dhe fanellën tonë, ai ka fituar 25 tituj, një shifër rekord në Real Madrid: 5 Liga të Kampionëve, 5 Kupa të Botës për Klube, 4 Superkupa Evropiane, 4 La Liga, 3 Kupa të Mbretit dhe 4 Superkupat e Spanjës. Karim Benzema është Topi i Artë i UEFA-s dhe Lojtari i Vitit aktual, përveç përfshirjes në FIFPRO FIFA Eleven dhe fitimit të Trofeut Pichichi 2022.

Çmimet e marra pas një prej sezoneve më të jashtëzakonshme në historinë tonë, veçanërisht në Ligën e Kampionëve, në të cilin kapiteni ynë luajti në ndeshje të paharrueshme që kontribuan që Real Madrid të fitojë Kupën e Katërmbëdhjetë Evropiane në Paris, duke qenë golashënuesi më i mirë i këtij kompeticioni me 15 gola. Karim Benzema është lojtari i pestë që ka veshur më shumë fanellën tonë me 647 ndeshje dhe është golashënuesi i dytë historik i Real Madridit me 353 gola. Ai është gjithashtu golashënuesi i dytë historik i Real Madridit si në Ligë ashtu edhe në Kupën Evropiane. Dhe ai është gjithashtu golashënuesi i katërt i Ligës së Kampionëve në historinë e këtij kompeticioni dhe golashënuesi i katërt në historinë e La Ligas.

Karriera e Karim Benzemas në Real Madrid ka qenë shembull i sjelljes dhe profesionalizmit dhe ka përfaqësuar vlerat e klubit tonë. Karim Benzema ka fituar të drejtën për të vendosur të ardhmen e tij.

Tifozët e Real Madridit dhe të gjithë tifozët e botës kanë shijuar futbollin e tij magjik dhe unik, i cili e ka bërë atë një nga mitet e mëdha të klubit tonë dhe një nga legjendat e mëdha të futbollit botëror.

Real Madridi është dhe do të jetë gjithmonë shtëpia e tij dhe i uron atij dhe gjithë familjes së tij më të mirat në këtë fazë të re të jetës së tij”, thuhet në njoftimin e Real Madridit.

Francezi pritet t’i bashkohet klubit arab, Alittihad, skuadër siç raportohet, ka bërë gati ofertën në vlerë prej 200 milkionë eurosh në vit për Benzeman.

Kujtojmë se Real Madridi dje ka konfirmuar largimin edhe të Marco Asensios, Eden Hazardit dhe Mariano Diaz, derisa thuhet se sot pritet të ketë edhe largime të tjera.